Link açıqlığı

Saatnıñ esas haberi

Keriç başlıqları Nikaraguanıñ Rusiyedeki elçisi kelgenini bildirdiler (+foto)


Haber etilgenine köre, elçini Rusiye Keriç memuriyetiniñ başı Sergey Borozdin qarşılar alğan. 
Haber etilgenine köre, elçini Rusiye Keriç memuriyetiniñ başı Sergey Borozdin qarşılar alğan. 

Rusiye idaresi astındaki Keriç memuriyeti şeerge Nikaraguanıñ Rusiyedeki fevqulâde ve salâhiyetli elçisi Alba Asusena Torres kelgenini bildireler.

Memuriyetniñ saytında haber etilgenine köre, elçi Acimuşkay taş ocağı ve Mitridat dağını ziyaret etken. O, Qırımnıñ işgalci vitse-baş naziri, Rusiye prezidenti yanındaki daimiy temsilcisi Georgiy Muradov ve Qırım medenit nazirliginiñ başı Arina Novovselskaya ile beraber edi.

“Musafirler içün Acimuşkay taş ocağı ve Mitridat dağına kezinti teşkil etildi. Büyük Mitridat merdiveniniñ restavratsiyası soñ safhasında. Kezinti çerçivesinde Alba Torres Rusiyeniñ eñ qadimiy şeeriniñ tarihı ve onıñ mirası aqqında bildi”, - yazıla bildirmede.

Keriçte Mitridat merdiveni
Keriçte Mitridat merdiveni

Memuriyette qayd etkenlerine köre, Terror yarımadada Qırımnıñ işğalci başı Sergey Aksönovnıñ daveti ile “iş ziyaretinen” buluna.

Alba Asusena Torres
Alba Asusena Torres

Ukrain tarafı elçiniñ Qırımğa ziyaretine daa cevap bermedi.

Avgustnıñ soñunda Ukraina TİN başı Dmıtro Kuleba, Qırımda Nikaraguanıñ fahriy konsullığı açılğanını bildirgen edi. Konsulnıñ vazifesine Qırımnıñ ilhaqında iştirak etken Oleg Belavenets tayin etilgen.

Oktâbrde Ukraina Nazirler Kabineti işğal etilgen Qırımda konsullığını açqanı içün Nikaraguağa sanktsiyalar qoymağa teklif etti. Nikaragua Ukraina ükümetiniñ qararını açıq tefsir etmedi.

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG