Azat etilgen ilk insannıñ birinci intervyüsı: Rustem Vaitov apis, qoltutuv ve kelecek planları aqqında (video)

Aqyardaki «Hizb ut-Tahrir davasınıñ» mabüslerinden biri Rustem Vaitov Rusiye apishanesinden azat etildi. O, Kurgan şeeriniñ koloniyasında tutulğan edi. Vaitov yarımadanıñ Rusiye işğalinden soñ «Hizb ut-Tahrir davası» boyunca apiske alınğan ve apis cezasını çekip azat etilgen ilk qırımlı mabüs oldı. Onı Rusiye Ceza kodeksiniñ 205.5 maddesiniñ 2-nci qısmına istinaden («Terror teşkilâtınıñ faaliyetinde iştirak etüv») qabaatladılar. 2017 senesi sentâbr ayında Vaitov 5 yıl umumiy rejim koloniyasında qalmasına üküm etildi. O, Qırım.Aqiqatqa intervyü berip, ileride «onıñ kibilerine» yardım etmege istegenini ve apiste alğan mektüpleri oña nasıl qoltutqanını ayttı. «Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi «Hizb ut-Tahrirni» terror ile bağları olğanında qabaatlap, teşkilâtnı yasaq etti. Aq qorçalayıcılar «Hizb ut-Tahrir davası» boyunca apiske alınğan ve mahküm etilgen qırımlılarnı siyasiy mabüs, taqip etilüvi ise diniy sebeplernen bağlı, dep tüşüne.