Kuku qorantası içün bütün dünyadan mektüpler (video)

"Emir-Üsein Kukunı azat etmege rica etem. Onıñ balaları Safiye ve Bekir babasını pek bekley. Bayramlar keçe, balalarnı muğaytmañız, babaçığını qaytarıñız. Men üçünci sınıf talebesim, küçük bir şeerde yaşayım, balalarnıñ ve bütün insanlarnıñ bahtlı kelecegi aqqında azru etem. Er kes öz evinde, öz vatanında yaşamağa istey. Kseniya Vasilyeva, 9 yaşında" - bu, apis etilgen Emir-Üsein Kukunıñ qorantası alğan bala mektüplerinden birisi. Onıñ qadını Meryem, qoltutuv mektüpleri dünyanıñ bütün köşelerinden kele, dep ayta. Olarnıñ eñ degerlisi ise, balalar yazğan mektüplardır. Meryem ve eki yaş balası - Safiye ve Bekir - babasını dört yıldan berli bekley - tamam o qadar vaqıt qırımtatar uquq qoruyıcı SİZOda tutula. O, "Hizb ut-Tahrir" teşkilâtına aitliginde qabaatlana. 2019 senesi oktâbr 11-inde, rusiye prokurorı Yevgeniy Kolpikov, uquq qoruyıcı Kuku içün şiddetli rejim koloniyasında 15 yıl istedi.