Link açıqlığı

Saatnıñ esas haberi

Qırım Rusiye regionı olğanını haritalarğa kirsetmege mecbur etken leyha Devlet dumasına tekrar kirsetilecek


Rusiye Federatsiyası Şurasınıñ azaları yaqın vaqıtta Rusiyede derc etilgen haritalarda ilhaq etilgen Qırım Rusiye sıñırları içinde olğanını köstermege mecbur etken yañartılğan qanun leyhasını Devlet dumasında baqılması içün berecek. Bu aqta sentâbrniñ 11-nde TASSqa Qırım adından senator olğan Olga Kovitidi haber etti.

“Bizler artıq bu qanun leyhasını azırladıq ve eñ qısqa muddet içinde o Devlet dumasına taqdim etilecek. Bu qanun coğrafyası biz tahmin etkenimizden de keniş olıp çıqtı. Çünki ilk başta “Reklama aqqında”ki qanunğa deñişmeler kirsetilmesi avale etilgen edi, amma bu pek az”, – dedi Kovitidi.

Onıñ sözlerine köre,“bu meseleniñ aktualligi açıq-aydın körünmekte”.

“Qanun leyhası olıp keçken siyasiy vaqianıñ obyektiv şekilde aks etilmesini belli bir qaidelerge bağlaycaq. Yani bütün dünya siayasiy haritaları, atlas ve yer kürreleri Qırım yarımadası Rusiye Federatsiyası terkibinde olğanını aks etmek kerek. Qanun leyhamıznıñ esas maqsadı budır, işte”, – dedi Kovitidi.

Daa evel haber etilgeni kibi, Rusiye Federatsiyası Şurasınıñ azaları, Qırım sakini olğan Olga Kovitidi ve Sergey Tsekov Rusiye harıtasında Qırım ve Aqyar aks etmegenini yasaqlağan reklamanen bağlı qanun leyhasını keri qaytariıp alğan ediler. Senatorlar qanun leyhasına ilâveler yapılmaq kerek olğanını iddia etken ediler.

Bundan evel Sergey Tsekov ve Olga Kovitidi Devlet dumasına ilhaq etilgen Qırımnıñ Ukraina terkibinde olğanını köstergen reklama ve matbaada basılğan coğrafik haritalarnen bağlı materiallar qullanmağa yasaqlağan qanun leyhası teklif etken ediler.

Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep ilân etti. 2015 senesi oktâbrniñ 7-nde Ukraina prezidenti Petro Poroşenko münasip qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña “tarihiy adaletniñ tiklenmesi” dey.

XS
SM
MD
LG