Avgustnıñ 27-nde Aqmescitteki “Hizb ut-Tahrir işi”niñ iştirakçileri Uzeir ve Teymur Abdullayev, Ayder Saledinov, Rustem İsmailovve Emil Cemadinov yaqın vaqıtta Rostov-na-Donı şeeriniñ SİZOsına yollanacağı aqqında belli oldı.Anda, Şimaliy Kavkaz okrugı arbiy mahkemesinde olarnıñ işi baqılmağa başlaycaq.
Aqmescitteki “Hizb ut-Tahrir işi”niñ iştirakçileri ne içün Rusiyege yollana? Aqlanıp çıqmağa imkânları barmı? Rusiye telükesizlik muessiseleriuquqimayeci ve faallerniñ işine keder etemi? Yuqarıdakiler ile diger suallerge Qırim.Aqiqat Radiosınıñ mutehassısları cevap bere.
Qırımlı adliyeci Emil Kurbedinov añlatqanına köre, Aqmescitteki “Hizb ut-Tahrir işi”niñ iştirakçileriniñ Rostov-na-Donı şeerine yollanılması Rusiye qanunnamesiniñ hususiyetlerine esaslanmaqta.
– Rusiye Cinaiy-protsesual qanunnamesine binaen bu kategoriyağa kirgen cinayetler mahkemege çekile. Em de hususan Şimaliy Kavkaz okrugınıñ arbiy mahkemesinde. Qırımnı olar Rostovğa, yani o vilâyetke bağlay ve hususan bu arbiy mahkeme anda yerleşe.
Vatandaşlar erkinligi merkeziniñ leyhalar koordinatorı Oleksandra Romantsova “Hizb ut-Tahrir” iştirakçileriniñ taqip etilüvi siyasiy sebeplernen bağlı olğanına işandıra.
“Hizb ut-Tahrir” faaliyeti iç bir telüke ya da terroristik meyil köstermegen ediOleksandra Romantsova
– Qırımda olıp keçkenlerge baqacaq olsaq, bu umumen siyasiy ceetten qırımlı faallerni taqip etilgenini aqlamaq içün basit bir sebeptir. Baqacaq olsaq, ep genç qırımtatar musulman erkekler tevqif etile. Aslında, adet üzre qorantanı erkekler teminlegeni içün, bu bütün ailelerge tesir ete. “Hizb ut-Tahrir” faaliyeti iç bir telüke ya da terroristik meyil köstermegen edi. Ukrainada bu tamamile barışıqsever teşkilât sayıla.
Emil Kurbedinov “Hizb ut-Tahrir” iştirakçileri kerçek apis muddeti mahküm etilir dep saya.
Ukraina vatandaşlarınıñ Rusiyege bu şekilde avuştırıluvı – insaniy aqlarnıñ bozuluvı sayılaEmil Kurbedinov
– Biz iç bir şey hayal etmeymiz. Bu tamamile siyasiy sebeplernen bağlı işler. Allah bersin de yañlış aytqan olayım, amma 99,9% - qabatlav qararları çıqarılır. Bu maddeler boyunca mahküm etilgenler 10-15 yılğa kesile, atta ömürlik. Ukraina vatandaşlarınıñ Rusiyege bu şekilde avuştırıluvı – insaniy uquq, Jeneva şartnamesi, PASE rezolütsiyası ve halqara uquqnıñ bozuluvı sayıla. Bu bir arbiy cinayet dep tanıla.
Bundan ğayrı, Qırımda siyasiy sebeplernen bağlı vaqialarnen bağlı işlerni aydınlatqan faaller de telüke altına kire dep iddia ete “Qırım birdemligi”niñ faali Remzi Bekirov.
Resmiy malümatqa zıt kelgen ya da kerçek malümat bergenler repressiyalarğa oğrayRemzi Bekirov
– “Qırım birdemligi”ne tazyıq yapıla: faaller tevqif etile, yer tapmaqnen alâqalı meseleler çıqa, maneviy basqı yapıla ve saire. Resmiy malümatqa zıt kelgen ya da kerçek malümat bergenler repressiyalarğa oğray.
“Hizb ut-Tahrir” halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi “Hizb ut-Tahrir” teşkilâtını “terrorist” birleşme cedveline kirsetip, onı yasaq etti.
“Hizb ut-Tahrir işi” boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
(Metinni Artöm Laptiyev azırladı)
