İlhaq etilgen Qırımdaki qırımtatarlarğa nisbeten bütün “Hizb ut-Tahrir işleri” boyunca lingvistik-diniy ekspertizalarnıñ hulâsaları Aqmulla adına Boşqortıstan devlet pedagogika universitetiniñ mutehassısları tarafından azırlanğan.
Bu aqta avgustnıñ 27-nde “Qırım birdemligi” körüşüvinde adliyeci Emil Kurbedinov haber etti.
“Şimdi Rostov-na-Donuda Bağçasaraydaki balalarnıñ işi boyunca mahkeme ötkerile, qabaatlağan taraf öz delillerini köstere. Cinaiy işlerniñ bütün kategoriyaları boyunca öz ekspertizalarını yazğan mutehassıslar (sorğulamağa -QA) keldi ve olarnıñ epsi Başqortıstanlı aynı mutehassıslardir. Olarnıñ ekspertizaları muşkül derecede külgüli, atta eñ sade qonuşmalarnı bile olar o qadar bozğan ki, insanlarnı kerçekten de bir terroristlerge çevire”, - dep ikâye etti Kurbedinov.
Adliyeci qayd etkenine köre, imayeciler “Hizb ut-Tahrir işi”nde işbu mutehassıslarğa nisbeten “muayyen bir yol” saylâğan, lâkin onıñ inceliklerini açıp bermey.
“Bizler Rusiyede uyğun mutehassıslarnı taptıq, olar ise ilmiy ve esaslı yollarnen FSB mutehassıslarınıñ hulâsalarını darma-dağın etti”, - dep ilâve etti Kurbedinov.
Mevzuğa dair: ”Ekstremzim tapılmaq kerek”: Qırımda Rusiye mahkeme sistemasınıñ hususiyetleri
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
