Avgustnıñ 13-ünde Rusiye nezareti altındaki Aqmescitniñ Kıyıv rayon mahkemesi bloger Nariman Memedeminovnıñ davası boyunca tahqiqatçınıñ muracaadını qanaatlendirdi ve tevqif müddetini 2 ayğa uzattırdı.
Bunıñ aqqında Qırım.Aqiqat muhbirine blogerniñ adliyecisi Edem Semedlâyev haber etti.
Memedeminov oktâbrniñ 15-inece SİZOda tutulacaq.
Adliyeciniñ aytqanına köre, tahqiqatçı tevqif müddeti uzatmasınıñ zaruretini tolusınen açıqlap olamadı. Sadece daa, eñ azından, üç şaatnı sorğuğa çekmek ve Memedeminovnıñ statsionar psihiatrik ekspertizasınıñ neticelerini almağa istegenini bildirdi.
“Men buña qarşı edim, çünki üç şaatnı sorğuğa çekmek içün bir kün yeterli, tahqiqatçınıñ ise dört ayı bar edi. Ekspertiza iyünniñ 26-sına bitti ve, menimce, onıñ neticelerini endi çoqtan belli. Mudafaa tarafını da onen tanıştırmaq - bir kün kerek”, - qayd etti Semedlâyev.
Mahkeme oturışı qapalı tarzda keçti, anda tek Memedeminovnıñ apayı Lemaranı yiberdiler. Adliyeciniñ aytqanına köre, mahkeme baqıluvınıñ devamında Memedeminovnıñ “bir qaç muracaatı” bar edi: mahkeme oturışınıñ açıq keçirilmesi, qararnıñ açıq oturışta ilân etilmesi, audio yazılması, protokolnıñ berilmesi, dava malümatınen tanışması aqqında. Amma muracaatlarnıñ çoqusını mahkemeci Yanina Ohota red etti. Memedeminovnıñ mudafaası makeme qararını temyiz etecek.
Ukraina Yuqarı Radasınıñ İnsan aqları boyunca vekâletlisi Lüdmila Denisova Rusiyeden qırımlı bloger, faalci Nariman Memedeminovnıñ Qırım psihiatriya hastahanesine mecburen yatqızılğanına dair malümat bergenini talap etti.
Mayıs 15-te Rusiyeniñ kontroli altında olğan Aqmescitniñ Kiyevskiy rayon mahkemesi, terrorizm propagandasında qabaatlanğan qırımtatar faali, vatandaş jurnalisti Nariman Memedeminovnıñ tevqif muddetini dört ayğa uzattı.Memedeminov avgustnıñ 15-ne qadar tahqiqat izolâtorında qalacaq.
Martnıñ 23-nde Qırım MC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden evelki taqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesini «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
