Qırımnıñ rusiye akimiyeti sadece Qırımtatar akademik muzıkalı drama teatriniñ bediiy reberini deñiştirmege degil de, teartni aslı yoq etmege istey.
Bunıñ aqqında Qırım.Aqiqat Radiosı efirindeб Bilâl Bilâlovnıñ işten boşatılğanını tefsir eterek, qırımtatar Milliy Meclisniñ reisi, Ukraina halq mebusı Refat Çubarov bildirdi.
“Olar aslı başqa adamnı tapar, qullanır ve qısqa vaqıtta ondan qutulırlar. Rusiye işğalcileri sadece rejissörni deñiştirmek degil, teatrni yoq etmege istey”, - dep qayd etti Meclis reisi.
Bilâlovnıñ atta “işğal şaraitinde uyğunlaşmağa” tırışqanına baqmadan, onı işten çıqardılar dep qoştı Refat Çubarov.
“Bilâlov, öz yapqan işini qurtarmaq ve devam etmek içün, olduqça şaraitlerge uyğunlaşmağa tırışqan adamlardandır. O Qırım işğaline açıq qarşılıq köstermedi, amma işğalciler ondan beklegenini de yapmadı. Yani, bütünley boysunmaqtan uzaq edi ve olar bunı duydı. Şimdi ise onıñ vaqtı keldi”, - dedi Çubarov.
Qırımtatar akademik muzıkalı drama teatriniñ reberi, onı uydurılğan mananen işten çıqardılar dep saya.
Avgustnıñ 7-sinde işğal etilgen Qırımda Qırımtatar akademik muzıkalı drama teatriniñ bediiy reberi ve rejissöri, Ukrainada nam qazanğan sanaat erbabı Bilâl Bilâlov işten çıqarılğanı belli oldı. Teatrniñ kollektivi öz bediiy reberine qoltuttı.
Bilâlov Qırımtatar akademik muzıkalı drama teatrinde 1989 senesinden başlap çalıştı, teatriniñ bediiy reberi ve müdiri 1994 senesi oldı.
