Rusiye tarafından ilhaq etilgen Qırımda Qırımtatar akademik muzıkalı dramatik teatriniñ bediy reberi ve rejissörı, Ukraina nam qazanğan sanat erbabı Bilâl Bilâlov işten boşatıldı.
Bu aqta özüniñ Facebook saifesinde Qırımtatar Milliy Meclisiniñ reisi Refat Çubarov haber etti.
“Qırımtatar Milliy Meclisi ve öz adımdan Qırımtatar akademik muzıkalı dramatik teatriniñ bediy taqımı ve qırımtatar cemaatçılığınıñ bu hususnen bağlı ğazabına paylâşam. Qırımda rusiyeli işğalciler tarafından yapılğan nevbetteki cinayetine halqara cemaatçılıq ve mahsus halqara teşkilâtlar, şu cumleden UNESKO tarafından kerek şekilde degerlendirilmesi içün elimizden kelgen er şeyni yapmağa tırışacaqmız”, – dep yaza Çubarov.
Onıñ sözlerine köre, Bilâlov, ilhaq muitinde çalışqan diger reberler kibi, “Rusiye işğalinde, bu yıl 117 yaşını toldurğan yekâne qırımtatar teatrini salqapqalmaq içün defalarca muayyen sanat ve ictimaiy uzlaşuvğa barmağa mecbur qalğan”.
Qırım.Aqiqat Bilâlovdan bu hususnen bağlı izaat almağa tırışa.
Bilâlov Qırımtatar akademik muzıkalı dramatik teatrinde 1989 senesinden berli çalıştı, 1994 senesi ise, bediy reberi-müdiri oldı.
