Mahsus Qırım.Aqiqat içün
Moskva, Qırımnı bir platsdarm olaraq qullanıp, Ukrainağa qarşı provokatsiya azırlay. Bir sıra faktlar Kreml, Ukrainanıñ itibarını tüşürmek ve memurlarğa «terorist hunta» yarlığını asmaq maqsadınen, nevbetteki «aynecilik plan» işlep çıqarğanını köstere. Qırım ise bu operatsiya içün pek kelişe.
Ukraina halq deputatı, «Haber qarşılığı» gruppasınıñ koordinatorı Dmıtro Tımçuk, Kremlniñ mahsus hızmetleri, ihtimal, Qırım ealisine qarşı terroristik areketler azırlap, soñradan Kyivni qabaatlaycaq ola, dep ayttı.«Toplanğan malümatqa köre, Rusiye mahsus hızmetleri yaqın zamanda (iyül soñu- avgust ayınıñ başında) ilhaq etilgen Qırım MC territoriyasında, şu cumleden, ilhaq etilgen Qırım ealisine qarşı kütleviy qurban ketirecek terroristik aktlar ötkerecek provokatsiyalar teşkil etmege istey», - dep yaza deputat Facebookta.
Onın malümatına köre, ücüm etilecek noqtalar olaraq halq toplanğan yerler (alış-veriş merkezleri, bazarlar, kütleviy tedbirler ötkerilgen yerler), em de suv teminlev noqtaları ve yaqıt ambarları qullanıla bile.
Rusiyeli akimiyet olıp bitkenlerde nasıldır bir «ukrain diversantlarını» qabaatlamaq istey
Rusiyeli akimiyet olıp bitkenlerde bir daa nasıldır bir «ukrain diversantlarını», qabaatlamaq istey dep saya halq deputatı. Onıñ malümatına köre, Kremlniñ mahsus hızmetleri bunıñ içün siyasiy temel azırlamaqta. Rusiye Havsızlıq Şurasınıñ kâtibi Nikolay Patrusev Qırımnı ziyaret etken vaqıtta, dersiñ Kyivde çalışqan Ukraina tarafdarı olğan teşkilâtlarnıñ areketlerinden dolayı «anda istiqrarsızlıq telükesi devam ete eken» dep ayttı. «Rusiye mahsus hızmetleri ötkergen aktsiya tendentsiyaları taqip etilse, bundan evel Kreml nezareti altında bulunğan KHV mevcut tehdit aqqında cemaatçılıq fikrini şekillendirüvnen bağlı kampaniya başlatqanını körmek mumkün. Ve aslında, Herson vilâyetiniñ cenübiy-ğarbiy qısmını zapt etip almaq maqsadınen Rusiye ordusınıñ qullanılması içün suniy manaçıq yaratmağa areket ete», – dep yaza Dmıtro Tımçuk.
İnfrastruktura obyektlerini zapt etip almaq, Qırımğa Dnipro suvını yibermek içün tosmenni açmaq maqsadınen Herson vilâyetine ücüm etüv ihtimali – problemanıñ ufaq bir parçası sayıla. Rusiyelilerniñ esas maqsadı, Qırım sakinlerini suv ve elektriknen teminlevden daa da farqlı. Rusiye prezidenti Vladimir Putinniñ faalligine baqılacaq olsa, Kreml üç meseleni çezmek istey, yani: yañı sanktsiyalarğa yol bermemek, al-azırdaki soylârını yımşatmaq ve işğal etilgen Donbasstaki vaziyetil legalleştirmek.
AQŞ ükümeti bu baarde kirsetken sıñırlavları Kreml oligarhları üzerine ciddiy bir darbe endirdi. Sanktsiyalar daa ziyade arttırılğan taqdirde Moskva içün bu artıq devlet içinde büyük iqtisadiy problemalar çıqmasına sebep olacaq. Vladimir Putin «Minsk añlaşmalarını» becermeden ve işğal etilgen Donetsk ve Lugansk vilâyetlerinde (İEDLV-ORDLO) qalmaq maqsadınen bundan qaçınmağa areket ete. Kreml nevbetteki «aynecilik planını» çevirip, Ukraina esabına maliyeviy ve siyasiy problemelarını al etmege areket ete.
Kreml nevbetteki «aynecilik planını» çevirip, Ukraina esabına maliyeviy ve siyasiy problemalarını al etmege areket ete
Bloоmberg agentligi haber etkenine köre, Helsinkide keçken sammit esnasında Vladimir Putin Donald Trumpqa Donbaassnıñ «halq cumhuriyetleri» denilgen cumhuriyetlerinde «referendum» keçirmekni teklif etken. Agentlikniñ subetdeşleri iddia etkenine köre, Trump, «AQŞ prezidenti bunı tüşünmege çaresi olsun dep», onı bu ğaye aqqında nihaiy matbuat konferentsiyasında söz etmemege rica etken. Neşir menbaları bildirgenine köre, Putin halqara cemaatçılıq imayesi altında Donbassnıñ statusı içün rey berilgenini teklif etken. Beyaz ev şimdilik teklifnen bağlı izaat bermedi.Rusiye prezidentiniñ matbuat kâtibi Dmitriy Peskov, Donbass boyunca «bazı yañı ğayeler muzakere etildi» ve olar «işlenmek kerek» degen sözler ayttı.
Añlaşılğanına köre, «rey berüv» neticesinde Kreml, işğal etilgen rayon sakinleri adından Kyivden İEDLVge iç olmağanda, öz tış siyaset aqqına saip muhtariyet statusı isteycektir. Söz, terroristik «cumhuriyetlerniñ» legalleştirilmesi, artından da, sanktsiyalarnıñ lâğu etilmesi aqqında kete. Moskvanıñ daa evelki «aynecilik planlarına» baqacaq olsaq, Bloоmbergniñ malümatı doğru olıp çıqa. İşte bu da, Qırımda ihtimal berilgen provokatsiyalarnen doğrudan doğru bağlı olğanını köstere. Donbassta nebvetteki «referendum» keçirilmesi ancaq AB ve AQŞ Kyiv üzerine bastırğan taqdirde mumkün olur, lâkin bunıñ içün ciddiy bir sebepler kerek.
Kreml, sanki dersiñ, Donbass ve Qırım sakinlerini qorçalamaq içün «terroristik hunta» tezisini canlandırmağa istegeni pek elverişli sayıla
Rusiye akimiyeti ve mahsus hızmetleri böyle manaçıq tapmaq oğrunda faal çalışmaqta. Yarımadada terroristik aktlarnıñ sanalaştırıluvı ve Ukraina şarqında yapılğan arbiy provokatsiyalar Moskva içün kerekli informatsion muitini yaratabile. Kreml, sanki dersiñ, Donbass ve Qırım sakinlerini qorçalamaq içün «terroristik hunta» tezisini canlandırmağa istegeni pek elverişli sayıla. Yaqında Vladimir Putinniñ Donbassta «vaziyetniñ kerginleşme ihtimali bar» eken degen sözleri işbu kanava içün tamam uyğun.
Ortağa şöyle bir manzara çıqa. İlk başta Nikolay Patruşev Qırımda «istiqrarsızlıq telükesi devam ete» dep ayta, ondan soñ, Vladimir Putin Ukrainanıñ şarqındaki vaziyetnen bağlı noqta-i nazarını aynı sözlernen ifade ete. Eki sefer de söz, tamamile Kreml nezareti altında bulunğan territoriyalar aqqında yürsetilgen edi. Rusiyeniñ yolbaşçıları İEDLVde arbiy areketlerniñkerginleşmesinen beraber, Qırımda provokatsiyalar yapılabilecegini, buña faqat özü alâqadar olğanında «tahmin etip olabile».
Sergey Stelmah, qırımlı siyasiy közetici (telükesizlik maqsadı ile muellifniñ adı ve soyadı deñiştirilgendir)
«Fikir» rubrikasında bildirilgen fikir-tüşünceler müelliflerniñ noqtaiy nazarını aks ettirip, muarririyetniñ baqışlarını aks ettirmey bile