Qırım Muhtar Cumhuriyetiniñ prokurorı Gündüz Mamedov, Ukraina qanunlarını bozıp, yarımadada Rusiye ve Qırım akimiyeti tarafından teşkil etilgen halqara tedbirlerde iştirak etmek içün Qırımnı ziyaret etken çetel vatandaşlarnı cevapkâtlıqqa çeküvnen bağlı işni quvetlendirmege talap ete.
Bu aqta Qırım MC prokurorı iyülniñ 25-nde ötkerilgen Qırım telükesizlik organlarınıñ koordinatsion toplaşuvında söz yürsetti.
Prokuraturanıñ matbuat hızmeti haber etkenine köre, toplaşuvda Qırımnıñ qapalı limanlarına qanunsız kirgen deñiz gemileri, yapılğan uçaq seferleri, vaqtınca ilhaq etilgen territoriyalarğa çeşit forumlarda iştirak etmek içün kelgen çetel devlet temsilcilerinıñ kiriş-çıqış tertibini bozğanları muzakere etildi.
«Mahsus çetel tahqiqat muessiseleri ve halqara uquqiy yardımdan faydalanmaq kerek olğanını men defalarca qayd etken edim. Afsus ki, bunı tolusınen qullanıp olamaymız. Ebet, bizler, ukrain qanunlarını bozğan şahıslar cedvelini ep tolduramız, lâkin men qabaatlı şahıslarnıñ cevapkârlıqqa çekilmesi içün real adılar atılğanını talap etem. Men prezident Petro Poroşenkonıñ sözlerini tekrarlayım: biz tecavuzcı-devlet içün Qırımnı köterilip olamaycaq yükke çevirmelimiz. Gemi qatnamamağa, uçaqlar uçmamağa ve yabancı gastrollörlar kelmemege başlağan soñ,bu esnas daa ziyade tezleşir», – dedi Gündüz Mamedov.
Prokuraturanıñ matbuat hızmeti bergen malümatqa köre, toplaşuvda Qırım MC Milliy politsiyasınıñ Baş idaresi, Qırım MC SBU Baş idaresi, Herson vilâyeti, Qırım MC ve Aqyar gümrük idaresi ve Ukraina devlet Sıñır hızmetiniñ yolbaşçıları iştirak etti.
2017 senesi ukrain sıñırcıları Qırımnı qanunsız ziyeret etken medeniyet ve sanat erbapları olğan 104 çetel vatandaşınıñ Ukrainağa kirişini yasaqladı.
Yabancı artistler ve medeniyet saasınıñ diger erbapları gastrolge kelgende Ukrainanıñ qapalı olğan kiriş-çıqış noqtalarından ilhaq etilgen Qırımnı ziyaret eterek, ukrain qanunını bozalar.
Qırım Rusiye tarafından ilhaq etilgen soñ, 2014 senesi Ukrainanıñ qıta qısmınen yarımada arasında memuriy, amma aslında kerçek bir «sıñır» peyda oldı. Memuriy sıñırda «Kalançak», «Çaplınka» ve «Çonğar» olaraq üç kiriş-çıqış noqtası çalışıp başladı.
