İyülniñ 23-nde Rusiyeniñ Rostov-na-Donu şeeri Şimaliy-Kavkaz okrugınıñ arbiy mahkemesinde Bağçasaraydaki «Hizb ut-Tahrir işi» boyunca qabaatlağan tarafnıñ şaatı – FSB hadimi Nikolay Artıkbayev sorğulandı.Bu aqta Qırım.Aqiqat muhbirine adliyeci Oksana Jeleznyak haber etti.
«Sorğulav esnasında şaat Hizb ut-Tahrirniñ faaliyet printsiplerini izaatlamağa ıntıldı. Bu arada o, bu bilgini öz işi devamında şaatlarnıñ ikâyelerinden toplağanı aqqında ayttı. FSB hadiminiñ bergen cevapları arasında esasen biz imaye etken şahıslar, sanki dersiñ, Bağçasaray sakinleri arasında diniy teşviqat alıp barğanları aqqında aytılğan umumiy sözlerden ibaret edi», – dep ikâye etti adliyeci.
Jeleznyaknıñ sözlerine köre, qabaatlanğan şahıslar nasıl kitaplar dağıtqanı, nasıl teşviqat alıp barğanı, bunı kimler düñlegenine dair konkret suallerge şaat cevap berip olamadı. O, tahqiqat bu insanlarnı tapmadı dep iddia etti, dedi Jeleznyak.
Bir kün evel sorğulanğan Bağçasaraynıñ diger sakini Bağçasaraydaki «Hizb ut-Tahrir işi»niñ iştirakçileri aqqında musbet sözler ayttı.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulııp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
Bu yıl dava iştirakçileri Qırımdan qomşu Rusiyege yollanıldı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
