İyülniñ 23-nde Rusiyeniñ Rostov-na-Donu şeeri Şimaliy-Kavkaz okrugınıñ arbiy mahkemesinde Bağçasaraydaki «Hizb ut-Tahrir işi» boyunca qabaatlağan tarafnıñ şaatı sorğulandı ve dava materiallarınıñ bir qısmı oquldı. Bu aqta Qırım.Aqiqat muhbirine davanıñ iştirakçisi Remzi Memetovnıñ oğlu Dilâver Memetov ikâye etip berdi.
«Bağçasaray sakini ve dava iştirakçilerini tanığan qabaatlayıcı tarafnıñ şaatı sorğulandı. Sorğulav ne içündir 2013 senesiniñ vaqialarınen yani iştirakçiler tarafından şeerde ötkerilgen bala bayramınen bağlı edi. İmayecilerniñ -yarımada başqa devlet ihtyarında bulunğan devirdeki vaqialarnıñ bu cinaiy işke ne alâqası bar degen mantıqlı bir suali doğa. Sorğulavdan soñ prokuror, FSB eki yıllıq tahqiqat devamında toplağan dava materiallarınıñ bir qısmını oqudı», – dep ayttı Memetov.
Buña baqmadan, onıñ sözlerine köre, qabaatlanğanlar aqqında şaat musbet sözler aytqan.
«Bu insan mahkemekengenler aqqında terbiyeli, Allah qorqusı olğan ve camini devamlı ziyaret etken kişiler olğanlarını ayttı. Prokurornıñ, şaat olarnıñ ükümetni elge keçirüv teşebbüslerinden haberi barmı degen sualine, o menfiy cevap berdi», – dep qayd etti Memetov.
Ayrıca o iyülniñ 24-nde mahkemede qabaatlağan tarafnıñ gizli şaatı sorğulanacağı aqqında haber etti.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulııp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
