Rusiyeniñ SİZOsında tutulğan qırımlı Emir-Usein Kuku iyülniñ 17-nde, Rusiye ve Qırımda tutulğan butün siyasiy mabüslerniñ azat etilmesi talabınen 22 kün evel başlatqan açlığını toqtatmağa niyeti olmağanı aqqında ayttı. Bu aqta Qırım.Aqiqatqa adliyeci Sergey Loktev haber etti.
«Bugün o: «Küçüm yetkeni qadar açlıq tutmağa devam etecem». Men bellesem, bu açlıq onıñ sağlığına büyük zarar ketirir. Bundan üküm ne yaramay, ne de yahşı tarafqa deñişmez. Biz onen laf ettik ve imayecisi olaraq, o aqiqatqa küreşerek,öz sağlığı, atta ayatını telükege soqqanı içün pek ökünem. Ancaq men epbir açlıq tutmaqtan vazgeçirmege areket ettim: dep ayttı», – dep ikâye etti adliyeci.
Adliyeciniñ sözlerine köre, imayesi altındaki şahısnı ekimler teşkerip tura eken, faqat tedqiqler neticesini bildirmey ekenler.
«O, çigeri ve talağı ağırtqanı aqqında ayta. 2015 senesi o tutqan arada urğan büyregi de ağırta eken. Onıñ sağlığınen bağlı tibbiy vesiqalar – şimdilik gizli tutula. Onı nezaret etmege alıp ketseler de bir şey aytmaylar. Bizler Cezalarnı icra etüv Federal hızmeti ve prokuraturağa kerek soratmalar yolladıq. Bizge Kukunıñ sağlığınen bağlı vesiqalar taqdim etilgenini ve ayrıca, bizim imayemiz altındaki şahısqa nisbeten 4-nci SİZO hadimleriniñ areketleri teşkerilgenini talap ettik», – dep ayttı Loktev.
Mevzunen bağlı olaraq: «Onı qanunsızlıq mecbur etti»: Emir-Usein Kuku bir aftadan berli açlıq tuta
Adliyeci imayesi altındaki şahısnıñ ömür arqadaşı Meryem Kuku iyülniñ 17-nde qocasını ziyaret etmek içün izin alğanını bildirdi. «Yarın onı ziyaret etecek ve Emir-Useinni açlıq tutmaqtan vazgeçirir dep ümüt etem», – dep qoştı adliyeci.
Ayrıca adliyeci Edem Semedlâyev Emir-Usein Kukuğa semetdeşleriniñ açlıqnı toqtatsın degen bir çoq ricaları aqqında aytqanını haber etti.
İyülniñ 10-nda Emir-Usein Kukunı Rusiyeniñ Rostov-na-Donu şeeri SİZOsından belli olmağan tarafqa alıp ketilgen. SİZO hadimleri Sergey Loktevke onıñ imayesi altındaki şahıs ne yerge bulunğanı aqqında aytmaqnı red etkenler. Daa soñra Kukunı tibbiy muessisege teşkerüv içün alıp ketkenleri aqqında belli oldı.
Mayıs ayınıñ soñunda Şimaliy Kavkaz okrugınıñ arbiy mahkemesi Yaltalı «Hizb ut-Tahrir işi»niñ altı iştirakçisiniñ tevqif müddetini üç ayğa uzattı.
Bu iş boyunca qabaatlanğan Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk 2016 senesiniñ fevral-aprel aylarında Yaltada tutlğan ediler. Olar Rusiyede yasaq etilgen «Hizb ut-Tahrir» siyasiy İslâm teşkilâtına alâqadar olğanlarında qabaatlana.
Rusiye arbiy mahkemesi Yaltalı «Hizb ut-Tahrir işi»ni Aqmescitte ötkerilgen köçüci oturışuvlarında baqa edi. Ondan soñ tevqif etilgen Qırım sakinleri Rostov-na-Donu şeerine yollandı.
Ukraina Tış işleri nazirligi Rusiyeden Yaltalı «Hizb ut-Tahrir işi» iştirakçileriniñ azat etilmesini talap ete.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
