İyülniñ 17-nde Rostov-na-Donu şeeriniñ Şimaliy-Kavkaz okrugı arbiy mahkemesi oturışuvında işnen bağlı mutehassıs hulâsasını azırlağan tilci Yelena Hazimullinanıñ sorğulanuvı yekünlendi. Bu aqta Qırım.Aqiqat muhbirine adliyeci Edem Semedlâyev haber etti.
«Sorğulanuv esnasında mutehassıs apansızdan biz imaye etken şahıslar laqırdılarınıñ stenogrammasını taqiqatçılar elektron poçta vastasınen yollağanı aqqında hatırladı. Albuki daa evel keçken oturışuvlarda o bu stenogrammalar ne yerden peyda olğanını añlatıp olamağan edi. Maña qalsa bu «teşiklerni yamav» olaraq qanunnıñ qaba bir şekilde bozulğnını köstere. Onıñ mahkemeniñ üç oturışuvında yapqan çıqışaları –muvafaqiyetsizliktir. Mahkeme yahşı çalışsa, onıñ işbu hulâsasını yañlış delil sıfatında dava materiallarından aman alıp taşlamaq kerek. Hulâsa yapıluv esanasında pek çoq protsessual hatağa yol qoyulğan. Taqiqatçı eñ başında onıñ cinaiy cevapkârlıq taşıycağınen bağlı tenbiyelemegeni bile, hulâsanıñ tekmil olmağanını köstere», – dep kâye etti adliyeci.
İmaye tarafı hulâsanıñ işten çıqarılıp taşlanmasınen bağlı olaraq şikâyet bermek niyetinde. «Mutehassısnıñ bu hulâsası qanuğa zıt kele, çünki anda Rusiye Cinaiy-protsessual kodeksine uymağan pek çoq yerler bar. İmaye tarafı, mahkeme işbu hulâsanı işten alıp taşmamaq kerek olğanına dair munasip muracaat azırlaycaq», – dep qayd ete adliyeci Sergey Loktev.
Ayrıca mahkemede Yaltalı «Hizb ut-Tahrir işi»nen alâqalı video deliller baqılmağa başlandı. Olar iyülniñ 31-nde ötkerilecek nevbetteki oturışuvda baqılmağa devam etecek.
Mayıs ayınıñ soñunda Şimaliy Kavkaz okrugınıñ arbiy mahkemesi Yaltalı «Hizb ut-Tahrir işi»niñ altı iştirakçisiniñ tevqif müddetini üç ayğa uzattı.
Bu iş boyunca qabaatlanğan Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk 2016 senesiniñ fevral-aprel aylarında Yaltada tutlğan ediler. Olar Rusiyede yasaq etilgen «Hizb ut-Tahrir» siyasiy İslâm teşkilâtına alâqadar olğanlarında qabaatlana.
Rusiye arbiy mahkemesi Yaltalı «Hizb ut-Tahrir işi»ni Aqmescitte ötkerilgen köçüci oturışuvlarında baqa edi. Ondan soñ tevqif etilgen Qırım sakinleri Rostov-na-Donu şeerine yollandı.
Ukraina Tış işleri nazirligi Rusiyeden Yaltalı «Hizb ut-Tahrir işi» iştirakçileriniñ azat etilmesini talap ete.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
