«Kalançak» ve «Çonğar» teşkerüv kiriş-çıqış noqtaları 2018 senesiniñ soñuna qadar abadanlaştırılacaq. Bu aqta Qırım.Aqiqat Radiosı efirinde Ukrainanıñ vaqtınca işğal etilgen territoriyalar ve devlet içinde köçken şahıslar meselesi nazirligiiñ Qırım MC ve Aqyar meseleleri idaresiniñ başlığı Sergey Mokrenük ikâye etip berdi.
«Anda ciddiy bir qurucılıq yapılmaycaq, yalıñız mobil binalar yerleştirilecek. Devlet adından bugünki künde Ukrainanıñ butün avtostantsiyalarınıñ abadanlaştırılması içün mesuliyetli olğan işhane belgilendi. O işhane bu konstruktsiyalarnı quracaq ve yıl soñunda bu iş butünley bitecek ki, 2018 senesiniñ soñunda bizler tek şeritlerni kesmek degil de, artıq olardan hızmet alıp olurmız dep ümit etem», – dep qayd etti nazirlik temsilcisi.
Bir kün evel Ukraina Naziler Şurası Qırım memuriy sıñırı ve Ukrainanıñ qıta qısmı arasında yerleşken «Kalançak» ve «Çonğar» kiriş-çıqış noqtalarınıñ abadanlaştırılması içün 105,98 mln grivna ayıracağına qarar berdi.
2014 senesi Qırım Rusiye tarafından ilhaq etilgen soñ, Ukrainanıñ qıta qısmınen yarımada arasında memuriy, amma aslında kerçek bir «sıñır» peyda oldı. Memuriy sıñırda «Kalançak», «Çaplınka» ve «Çonğar» olaraq üç kiriş-çıqış noqtası çalışıp başladı.
