Rusiye nezareti altındaki Qırım Yuqarı mahkemesi Aqmescitli «Hizb ut-Tahrir işi» eki iştirakçisiniñ SİZOda tutulmasınen alâqalı appelâtsion şikâyetini red etti.
Qırım.Aqiqatnıñ muhbiri haber etkenine köre, Emil Cemadenov ve Rustem İsmailov avgustnıñ 11-ne qadar apiste qalacaqlar.
«Beklenilgeni kibi apis muddeti 2 ayğa uzatıldı, umumen ise, 22 ayğa. Men mahkemede aytqanım kibi bu muddet içindeeki bala doğurmaq mumkun: lâkin taqiqat bir cinaiy işni doğurıp olamay», – dep haber etti Qırım.Aqiqatqa Emil Cemadinovnıñ adliyecisi Edem Semedlâyev.
Onıñ sözlerine köre, Cemadinov mahkemede cinaiy işni siyasiy esaslı olğanı aqqında ayttı.
İsmailovnıñ adliyecisi Sergey Novikov «imayeci özüni yahşı is etkeni, körünişi fena olmağanı ve oña qol tutqan er keske selâm etkeni aqqında» haber etti.
Mahkeme oturışuvları qapalı rejimde keçti, soy-aqrabaları mahkem binasına bile kirsetilmedi.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
