Ukraina iç işleri naziri Pavlo Klimkin Ankarağa yapqan iş ziyareti esnasında Türkiye TİN reberi Mevlüt Çavuşoğlunen, Türkiyedeki qırımtatar teşkilâtlarınıñ temsilcileri ve iş adamlarınen meselelerniñ keniş yelpazesini, şu cumleden Rusiyedeki siyasiy mabüslerniñ azat etilüvi ve ilhaq etilgen Qırımda Qırımtatar Milliy Meclisiniñ aq-uquqlarınıñ tiklenüvini muzakere etecek.
«Bizim Rusiyedeki siyasiy mabüslerimiz ve Qırımda Meclisniñ aq-uquqları tiklenüvinden başlap, Rusiye ükümeti tarafından Bağçasaraydaki Han sarayınıñ ğayıp etilüvine qadar - er şey aqqında laf etilecek», – dep yaza Twitterde Klimkin.
2016 senesi Rusiye nezareti altındaki Qırım Yuqarı mahkemesi, bundan soñ, Rusiye Yuqarı mahkemesi de, Qırımtatar Milliy Meclisini yasaqlağan qarar qabul etti – dersiñ ki, Rusiye topraq bütünligne qast etüvi ve insanlarnı qorqızuvından dolayı o ekstremistik teşkilât dep tanıldı.
2017 senesi aprel ayında BMT Halqara mahkemesi Ukraina bergen şikâyetnen bağlı ara qararınen, Rusiyeni Meclisnen alâqalı sıñırlavlarını lâğu etmege mecbur etken edi.
Mayıs ayında BMT halqara mahkemesi Rusiyege muracaat eterek, Meclisniñ faaliyeti tiklengeni ve Qırımda ukrain tilinde tasil berilgeninen alâqalı mahkeme qararını eda etkenine dair malümat bermege talap etken edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
