Link açıqlığı

Saatnıñ esas haberi

ABD devlet departamenti: Rusiye qırımtatarlarnıñ diniy aq-uquqını boza


Rusiye qırımtatarlar taqipge oğrağan Qırımda diniy azınlıqlarğa zulum etmek içün ekstremizmge qarşı küreş aqqındaki qanunlarınen faydalana. Bu aqta dünya diniy serbestlikke riyayet etüvnen bağlı ABD Devlet departamentiniñ er yıllıq maruzasında söz yürsetile.

Maruzanıñ muellifleri, yarımadada Rusiye ükümeti qırımtatarlarnıñ diniy serbestliklerini bozayatqanı qayd etip, «Memorial» uquimaye cemiyetiniñ yıllıq esabatına qırımtatarlar da kirgen siyasiy mabüsler cedvelini misal etip köstere.

Maruzada, diniy serbestlikten dolayı soñki yıllar devamında siyasiy mabüsler sayısı artqanı, lâkin siyasiy mabüslerniñ iç biri «zorbalıq işletmegeni, zorbalıqqa çağırmağan ya da zorbalıq planlaştırğan areketler yapmağanı» qayd etile.

«Cedvelge kirgenlerniñ ekseriyeti – musulmanlar ve çoqusı «Hizb ut-Tahrir» teşkilâtında iştirak etüvde qabaatlana», – denilmekte ABD Devlet departamentiniñ dünyadaki diniy serbestlikke riyayet etüvnen bağlı maruzasında.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.

XS
SM
MD
LG