Alıp qaçılğan ve soñradan devlet avtomobil inspektsiyası hadimleriniñ urbasındaki belli olmağan şahıslar tarafından köteklengen Qırımtatar Qurultayınıñ delegatı Asan Egiz, oña yapılğan ücümni ilhaq etilgen Qırımda Rusiye küç idaresiniñ hadimleri tarafından qırımtatarlarnıñ taqip etilüvine meyil berilgenini köstere dep izaatlay.
«Qırımda soñki zamanlarda faaller ve umumen qırımtatarlar üzerine yapılğan tazyıq eksilmey. Mecliske nisbeten açılğan yañi cinayet işi – buña bir delildir. Bu - Qırımda üküm sürgen, öz pozitsiyası ve kerçekni qabul etmegen halqnıñ taqip etilüviniñ bir misalidir. Meni alıp qaçqanlarını ancaq bu şekilde izaatlaybilem», – dep ikâye etti Egiz Qırım.Aqiqat muhbirine.
Mayısnıñ 23-nde Aqmescit rayonı Colman (Pionerskoye) köyünde uniforma kiygen insanlar Qırımtatar Milliy Qurultayınıñ delegatı Asan Egizni tutıp alğan ediler. Qırımdaki Rusiye FSB idaresi Egizni tutıp alğanını inkâr etti. Daa soñra alıp qaçılğan şahıs köteklengen alda ormandan tapıldı.
Ukraina tış işleri nazirligi Asan Egizniñ ilhaq etilgen Qırımnıñ Aqmescit rayonında alıp qaçılğanını takbih etti.
Rusiye küç idaresi hadimleriniñ bu hususnen bağlı daa bir açıq izaatı yoq.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.
