Link açıqlığı

Saatnıñ esas haberi

Rostov: Yaltalı «Hizb ut-Tahrir işi» boyunca mahkeme ekspertizasını ilân etüvge keçtiler


Mayısnıñ 22-nde Şimaliy-Kavkaz okrugınıñ arbiy mahkemesi oturışuvında Yaltalı «Hizb ut-Tahrir işi» boyunca qısmen mahkeme ekspertizasınıñ materialları oquldı. Bu aqta Qırım.Aqiqatqa adliyeci Edem Semedlâyev haber etti.

«Onda (ekspertizada– QA) mutehassıslar, işniñ iştirakçileri «Hizb ut-Tahrir» azası olğanlarını öz hulâsalarını gizli diñlegenleri esasında çıqarğan. Ekspertizanıñ tahminen 70 saifesi oquldı, umumen ise o 400 saifeden ibaret», – dep ikâye etti Semedlâyev.

Mahkemede Ukrainanıñ Rostov-na-Donu şeerindeki Baş konsulı bar edi, dep haber ete «Qırım birdemligi».

Haber etilgenine köre, paralel olaraq mahkeme oturışuvı Aqmescitte de videobağ vastasınen devam etken. Nevbetteki otıurışuv mayısnıñ 23-ne tayin etildi.

2016 senesi fevral-mart ayları arasında Yaltada Arsen Cepparov, Refat Alimov, Emir-Üsein Kuku, Muslim Aliyev, Enver Bekirov ve Vadim Sirük tutulıp alınğan edi. Olar Rusiyede yasaqlanğan «Hizb ut-Tahrir» islâm siyasiy teşkilâtına alâqası olğanındsa qabaatlanğan edi.

Rusiye arbiy mahkemesi Yaltalı «Hizb ut-Tahrir işi» mahkemelerini Aqmescitte köçme oturışuvda keçire edi. Ondan soñ tevqif etilgen qırımlılar Rostov-na-Donu şeerine yollanıldı.

Ukraina tış işleri nazirligi Rusiyeden Yaltalı «Hizb ut-Tahrir işi» altı iştirakçisiniñ azat etilmesi talap etken edi.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.Halqara uquq işğal etilgen territoriyalarda işğalci devlet qanunlarınıñ kirsetilmesini yasaqlay.

XS
SM
MD
LG