Link açıqlığı

Saatnıñ esas haberi

«Ölü noqtada»: ne içün Qırımda Ervin İbragimovnıñ alıp qaçılması tahqiq etilmey


Ervin İbragimov. Arhiv fotosureti
Ervin İbragimov. Arhiv fotosureti

Qırımtatar faaliyetçisi, Dünya Qırımtatar Kongressiniñ icra komiteti azası Ervin İbragimovnıñ alıp qaçılmasından soñ aman-aman eki yıl keçti. O, 2016 senesiniñ mayısında Bağçasarayda ğayıp oldı. Daa soñra faaliyetçiler tarafından neşir etilgen közetüv kamerasınıñ videosında, İbragimovnıñ polis uniformalı adamlar tarafından toqtatılğanı körüne. O, qaçacaq edi, lâkin onı tutıp, zornen avtomobilge oturttılar. Ondan soñ maşina Bağçasaray suv anbarı tarafına yol adlı. Faaliyetçiniñ bundan soñki taqdiri belli degil.

Bu yıl onıñ alıp qaçılğan yerinde Rusiyeniñ Qırım başlığı Sergey Aksönovnıñ patronatı altında qırımtatarlarnıñ Hıdırlez bayramı ötkerildi. Mayısta Kremlniñ kontroli altında olğan Qırım Yuqarı mahkemesi, Aqmescitteki Kiyevskiy rayon mahkemesiniñ qararına qol tutıp, Ervin İbragimovnıñ aqrabaları tarafından Rusiye uquqqoruyıcı organlarınıñ areketsizligine qarşı berilgen şikâyetni red etti.

Rusiyeniñ sabıq Qırım prokurorı Natalya Poklonskaya yerli televizion efirinde, Ervin İbragimovnıñ alıp qaçuvı bir provokatsiya edi, dep öz fikrini paylaştı:

Natalya Poklonskaya
Natalya Poklonskaya

«Bu, Qırımda vaziyetni stabilsizleştirmek, bu cinayetni GİBDD (Yol areketiniñ telükesizligi devlet inspektsiyası) hadimleriniñ uniformasını kiygen adamlar tarafından işlengeni ile alâqalı olaraq, Qırım Cumhuriyetiniñ uquqqoruyıcı organlarına iftira atmaq, mahsus olarğa qarşı böten laflar ayttırmaq maqsadınen yapılğan alıp qaçuvdır. Bu doğru degil, çünki bu post yoq edi, bu avtomobil, Qırım boyunca GİBDD hadimleriniñ avtomobili olaraq resmiy qaydğa alınmadı».

İş ölü noqtada toqtap qaldı. Endi 20 aydan berli onen kimse oğraşmay
Umer İbragimov

– Oğlumnıñ ğayıp olğanınıñ birinci aylarında Rusiye uquqqoruyıcı organları daa nasıldır tahqiqat areketlerini yapa edi. Belki de, men olarnı er kün zıqarlağanım içündir. Lâkin baş idarege alıp berilgen soñ iş ölü noqtada toqtap qaldı. Endi 20 aydan berli onen kimse oğraşmay. Men, ukümetke muracaat etmekniñ, tıpqı tahqiqatçılarnıñ areketsizligine şikâyet etmekniñ kibi, iç bir faydası olmağanını añladım. Em Kiyevskiy rayon mahkemesinde, em de Qırım Yuqarı mahkemesinde maña, olarnıñ sanki çalışqanlarını bidirdiler, lâkin men bu 20 ay içinde areket körmeyim. Krasnodar dyarından açılğan telefonlarınıñ detalizatsiyasını men özüm qıdırıp elde ettim. Ervinniñ ğayıp etkeninden bir buçuq ay keçken soñ anda dalğıçlarnı yollaylar – bu, köz boyamadır, dalğıçlar özleri de buña açuvlandı. FSB tarafından alıp qaçuv ile videoqaydnı doğrudan-doğru almaqnı red ettiler. Poçta vastasınen, alınğanı aqqında bildirüv berilmesi ile yollamaq kerek oldı.

Umer İbragimov
Umer İbragimov

Umer İbragimovnıñ aytqanına köre, belli olmağan kişiler, ğayıp olmazdan evel Ervinni eki ay közetip taqip ettiler. Babasınıñ umüti, Rusiyege tazyiq ete bilecek ve oğlunıñ taqdirini aydınlatmağa yardım ete bilecek dünya toplulığındadır.

Qırımtatar Milliy Meclisiniñ azası, Qırımtatar halqınıñ aqlarını qorçalav komitetiniñ reisi Eskender Bariyev, Qırımda 2014 senesinden soñ bu ve diger alıp qaçuvlar içün bütün mesüliyet Rusiyede olğanını iddia ete.​

Men bu alıp qaçuvnı, siyasiy sebepten yapılğan, dep sayam
Eskender Bariyev

– Men bu alıp qaçuvnı, siyasiy sebepten yapılğan, dep sayam. Ervinni Dünya Qırımtatar Kongressi icra komitetiniñ azası sayladılar, o, yerli meclisniñ azası edi. İhtimal ile, yerli ukümet onda potentsial lider ve telüke köre edi. Bizim malümatımızğa köre, bugünge qadar Qırımda 17 kişi alıp qaçıldı. Olar aqqında iç bir malümat yoq. Amelde bütün bu adiseler tahqiq etilmey: işler sözde toqtatılmadı, amma bunıñnen beraber iç bir faal areketler yapılmay. Ervinge dair biz iç bir aydılanuv körmeymiz. Menim fikrimce, bu, işke işğalci ukümetniñ telükesizlik strukturalarınıñ vekilleri ya da «özüni mudafaa» dep adlandırılğanlarnıñ alâqası olğanı ile bağlı. Öz taraftan biz dünya toplulığınıñ diqqatını çekmek ve Rusiye Federatsiyasına tazyiq etmek kerekmiz. Er bir ğayıp olğan insan içün mesüliyetli olğan odır.

Eskender Bariyev
Eskender Bariyev

(Metinni Vladislav Lentsev azırladı)​

XS
SM
MD
LG