Rusiye nezareti altındaki Qırım Yuqarı mahkemesi Aqmescitniñ Kyiv rayon mahkemesi adliyeci Emil Kurbedinovnıñ taqiqat orğanlarına 2016 senesi hırsızlanğan qırımtatar faali Ervin İbragimovnen alâqalı soravı boyunca bergen şikâyetini red etüv aqqındaki qararına qol tuttı.
Qırım.Aqiqat muhbiri haber etkenine köre, adliyeci Emil Kurbedinov taqiqat butün muracaat ve soratuvlarnı közde ardı etip, yalıñız mahkemede cevap bergenine diqqat çekti.
«Uquqqorçalama organları ile aramızdaki munasebetler bayağı kergin. Soratuv yollağanımda – cevap bermeyler, mahkemege bergenimde – aman er şeyni taqdim eteler. Mahkemeci Mojelyanskiy eki aydan soñ cevaplar mahkemege ketirilgenini esapqa alıp, demek menim şikâyetrlerimni tatmin etmek kerekmey dep qarar berdi. Bu cevaplar tamam mahkemeden evel azırlanğanından eminim», – dep ayttı adliyeci.
Dünya qırımtatar kongressi icra şurasınıñ azası Ervin İbragimov 2016 senesi mayıs ayında Bağçasarayda belgisiz insanlar tarafından hırsızlandı. Video nezareti kamerası Rusiye yol inspektorları urbasındaki eki kişi İbragimovnıñ maşinasını toqtatıp, onı mikroavtobusqa çekip kirsetkenini qayd ete.
Qırım uquqimaye gruppası bu hızrsızlıqqa rusiyeli akimiyet ya da paramillitar gruppalarnıñ alâqası bar olğanını iddia ete.
