Canada ukrainalılar Kongressiniñ prezidenti Pavlo Grod halqara cemaatçılıq qırımtatarlarnıñ aq-uquqına yeteri qadar faal qorçalamay dep saya.
Bu aqta o «Ukrinform»ğa bergen izaatında söz yürsetti.
«Bizler 74 yıl evelsi qırımtatar halqınıñ soyqırımı yapılğanını hatırlamaymız, ancaq, afsus ki, bu soyqırım bugün de devam etmekte. Faqat dünya bu aqta unuttı ya da susmaqnı uyğun köre», – dedi Grod.
Onıñ sözlerine köre, Canadanıñ ukrain ve qırımtatar cemiyetleri, Qırım ve qırımtatarları içün yapılğan küreş aynı zamanda Ukrainanıñ da mustaqilligi oğrunda yapılğan küreş olğanından emin.
Bunen beraber Grod Canadadaki ukrain ve qırımtatar cemiyetleri arasındaki işbirlikten memnün olğanını bildirdi.
«Bizler qırımtatar cemiyetinen işbirlik yapip olğanımızğa pek quvanam», – dep yekünlerdi o.
Canada TİNniñ reberi Chrystia Freelandnıñ qırımtatar halqı sürgüniniñ qurbanlarını añma yıllığı munasebetinen yapqan beyanatında, Canada ükümeti Rusiye işğali altında bulunğan Qırım yarımadasında insan aqları fenalaşqanından raatsızlıq duyğanı ve yarımadada yaşağan qırımtatarlarğa er taraflama qol tutmaq niyetinde olğanını qayd etile.
Mayısnıñ 17-nde aqşam Aqmescit rayonınıñ qırımtatarlar kütleviy yaşağan Aq-Meçit Camide qırımtatar halqınıñ sürgün qurbanlarını añma Kününe bağışlanğan – «Qalbiñde ateş yaq» - aktsiyası ötkergen qırımlılar tutulıp alınğan edi. Tutulğan ve arasında çağına yetmegen balalar olğan yigirmige yaqın insan beş dane politsiya maşnasınen Aqmescit rayon politsiya idarelerine dağıtıldı.
Daa soñra tutulğan şahıslarnıñ bazılarından izaatnameler, parmaq izleri ve DNK nümüneleri alınğan soñ qoyıp yiberildi.
Qırımdan qırımtatar halqı sürgüniñ qurbanlarını añma künü er yıl mayısnıñ 18-nde qayd etile. O künü yarımadadan Orta Asiyağa qırımtatarlarnıñ ilk eşelonı yollana. Epsi olıp 180 biñden ziyade insan sürgün etilgen.
