Defalarca yazdım, lâkin Vladimir Putinniñ siyasiy karyerasında yapqan eñ büyük hatası, atta büyük degil de, ölümlik hatası – Qırımnı ilhaq etüvi olğanında bir daa iqna olam.
Rusiye Qırımnı ilhaq etkeninden itibaren, onıñ başına belâ, oğursızlıq ve problemalar tökülip başladı. Em de olar ep inkişaf ete ve daa ziyade tezleşe. Yaqında olıp keçkenler üzerinde toqtalayıq.
Kreml tarafdarı olğan KHV Aqmescitniñ yañı ava limanını maqtap yetiştirmediler de, artından ağlarda ilk küçlü rüzgâr ve yağmurdan soñ, terminal binası egilgeninden tavanı aqıp başlağanınen bağlı videonen beraber öz közünen körgen şaatlar derc etken malümat peyda oldı. Bu basit bir oğursızlıq degil – bu bir masqaralıqtır. Artıq, Rusiyede yapılğan raketa ve uçaqlar kökke yükselip yetiştiralmay yerge tüşkenine alıştıq, şimdi ise, yaqında qurulğan binalar fırtınalı rüzgârğa bile dayanıp olamay!
İşke tüşürilmegen köpür bile tamir etile – üzerinde çatlaqlar peyda olğan. Bu soyu ise, masqaralıq degil de – deşet
Qırım köpürü denilgen köpür de – çette qalmay. Bir qaç milliard ruble sarf etilip qurulğan obyektniñ bile tikişleri qopayım dep tura. Mayısnıñ 9-nda işke tüşürmege istegen ediler, lâkin onıñ dayanıqlığına işanalmay başqa künge avuştırmağa macbur qaldılar.Kene de ağlarda, daa işke tüşürilmegen köpür tamir etile eken degen malümat peyda oldı -deñiz tübündeki topraq üzerinde turğan qazıqları sürülip başlağanından çatlaqlar peyda olğan. Bu soyu ise, masqaralıq degil de – deşet. Men bellesem, böyle bir malümattan soñ Qırımda yaşağan ura-vatanperverlerniñ eyforiyası biraz söngendir, yüreklerini ise – «ya barıp ta yıqılsa» degen fikir qarmalaydır. Bu da, bir çoq hırsızlıq ve qabar berilerek, Putinniñ dostlarınıñ şirketleri tarafından qurulğan raketa, feza gemileri kibi, yıqılsa yıqılacaqtır.
Putinniñ Qırımdaki büyük dostalrı olğan - «ğalipler taqımı» ise? «Qırım köpüri» kibi, «ğalipler taqımı»nıñ da tikişler ana-mına qopayım dep tura.
Mahkeme Rusiye Devlet dumasında Qırım adından «deputat» olğan Andrey Kozenkonı borcunı tölemekten qaçqanında qabaatlap, ödemege mecbur etti. Bu arada mahkeme, özüniñ «faqır» olğanını ve «alçaq» bir deputat aylığına yaşağanı aqqında aytqan «deputatnıñ» şikâyetini red etti. Mahkeme mantıqlı olaraq, ayda 420 biñ ruble alaraq, bir kereden olmasa da, 10 millionlıq borçunı tölemege imkân berer dep añlattı.
Qırımnıñ ükümran tabaqasında – bir filmde olğanı kibi: er şey bitti, er şey yıqılayata
Meraqlısı şu ki, «deputatlıqqa» namzet olğanında Kozenkoöz beyannamesinde borcu aqqında iç bir şey yazmağan. Bu ise, Rusiye qanunlarına binaen bile onıñ deputat olğanınıñ qanuniyliginde şube doğura. Rusiye tarafdarları olğan Qırım sakinleri içün «ğalipler taqımı» olarğa böyle bir «deputatlarnı» tıqıştırğanını masqaralıq degilmi? Elderekte, mayıs bayramlarından evel«deputat» Qırım boylâp kezerek, Qızıl ordunıñ yüz yıllığına bağışlanğan medaller tarqatıp yürgen edi. İşte, sözde böyle bir «qızılordulı» ise, kerçekte, «yaramay bala» olıp çıqtı.
Qırım ükümran tabaqasında – bir filmde olğanı kibi: er şey bitti, er şey yıqılayata. İctimaiy ağlardan alınğan malümatqa köre, ailesi Aluştada dolandırıcılıq yolunen yataqhaneni munitsipal mülkiyetten çıqarğan Qırım MVDsiniñ reberi Sergey Abisov öz isteginen işten boşaycağına dair ariza yazğan eken – nazir vazifesini vaqtınca onıñ muavini Pavel Karanda eda etecek. Ukrainanıñ qıta qısmında öz şirketi ve Qırımda ticariy menfaatları olğan Qırım ükümeti yolbaşçısınıñ muavini Vitaliy Nahlupin de boşadı. Emiş-demişlerge köre, Sergey Aksönovnıñ özü ise, «meselelerni çezmek içün» acele sürette Moskvağa uçıp ketken eken.
«Ğalipler taqımı» mına böyle, işte. Oña: «bölüciler taqımı»,«hırsızlar taqımı» kibi, çeşit türlü lağaplar boşuna taqılmağan ya, atta Qırımnıñ meşur bir sakini olarğa «goblinler» dey. Böyleliknen olar em de olarnıñ Kremldeki imayecileri aqqında er şey aytılğandır.
Zarema Seitablayeva, Qırım sakini, bloger (telükesizlik maqsadı ile muellifniñ adı ve soyadı deñiştirildi)
«Bloglar» rubrikasında ifade etilgen fikirler muelliflerniñ öz noqtai-nazarlarını aks etip, muarririyetniñ noqtai-nazarını aks etmeleri şart degil