Rusiye Qırım ealisini deñiştirüv siyaseti keçirerek, 1944 senesi sürgün etilgen qırımtatarlardan soñ sovet akimiyetiniñ areketlerini devam ettire. Bu aqta mayısnıñ 15-nde «1944 senesi sürgüniniñ yıllığı – qırımtatarlarnıñ genotsidi» adlı matbuat konferentsiyasında Ukraina informatsion siyaseti naziriniñ birinci muavini Emine Ceppar ikâye etip berdi.
«Qırımtatarlar içün sürgün er bir bala bilgen yalıñız tarihnıñ ayrı bir saifesi sayılmay. Bu – ale daa devam etken küreşniñ bir qısmıdiır. 2014 senesiniñ vaqialarını hatırlap, bizler işğal aqibetleri – sürgün aqibetleri olğanını añlaymız. Qırım qırımtatarlarından temizlengen soñ, olarnıñ yerine – hususan Rusiyeden başqaları ketirildi. Bu mesele Qırımdaki siyasiy esnasnıñ bir parçası esaplana, onıñ içün şimdi Rusiye Qırımnen «ayrı bir bağ» olğanı ve «Qırımda yaşap rus tilinde laf etken ealiniñ qorçalanuvı» aqqında ayta», – dep ikâye etti o.
Ceppar yarımada ealisini deñiştirüv siyaseti SSCB ve zemaneviy Rusiye içün ananeviy dep sayıla. Onıñ sözlerine köre, Rusiyeniñ Qırımdaki areketleri «insanlarnı qorqu içine ğarq etmek, razı olmağanlarnı yarımadadan sıqıştırıp çıqarmaqnen» bağlı.
«Yarımadadan on biñlernen insanlar köçe. Aynı zamanda, doğru bir Rusiye formulası ögretmek maqsadınen arbiylerni, akimiyet temsilcileri, atta ocalarnı bile Rusiyeden ketireler. Bu halqara uquq bozuluvı sayıla, çünki işğal vaqtında ealini deñiştirmek yasaqtır», – dep ilâve etti Ceppar.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
