Qıtay yatırımcıları Qırımda öz leyhalarını amelge keçirecek olalar dep haber ete faal ve blogger Oleg Koçerov. O, yerli istisalcılar buña nasıl baqqanı ve bu nege alıp kelecegi aqqında ikâye etip berdi.
– Qıtaylı yatırımcılar Qırımda faal çalışmağa istegenleri kerçekmi, Oleg?
– Qıtaylı yatırımcılar Qırımğa kelmek niyetinde degil de, olar artıq Qırımdalar. 2017 senesiniñ soñunda (bahtımızğa) Qırımnıñ Şarqiy ve Şimaliy-Şarqiy qısmınıñ aman-aman bütün rayonlarında ve esasen deputat, memur ve olarğa yaqın olğan insanlarnıñ topraqlarında, yağmurdan soñ çıqqan mantar misali, qıtyaylı «yatırımcılarnıñ» muvaqqat teplitsları peyda oldı.
– Demek ki, olar artıq Qırımda resmiy olaraq çalışalarmı?
– Elbette. Olar açıq issedar cemiyetler açalar, iç bir problem çıqmadan «SİZ iştirakçisi» statusını elde eteler (Serbest iqtisadiy zona –QA). Vesiqalarda qıtaylılar cemiyet saibi olaraq körüne. Olar Rusiye prezidentiniñ Qırımdaki daimiy temsilcisi Georgiy Muradovqa bir ricalarnen muracaat eteler, albuki yerli sebzevatçılar içün bu irişilmez bir bolluq sayıla. Buña ise FMS (Federal migratsion hızmet –QA) tarafından gastarbayterlerniñ vesiqaları acele sürette azırlanması, biñlerce gektar qara topraqnen beraber tehnikası, ambarları ve kommunikatsiyalarınen birlikte «öldürilgen» kolhozlarnıñ ayırılması kire.
– Yerli akimiyet buña ne dey?
– Tabiiy ki, memur «apansızdan» qıtaylı yatırımcılarğa yardım qolu uzataraq, Qırım rayonlarıтıñ yolbaşçılarından olarğa er türlü yardım köstermesini rica ete.
– Qırım istisalcıları buña nasıl baqa?
– Yerli sebzevatçılarnıñ sözlerine köre, tez vaqıtta bereket elde etmek içün sebze asrağanda qıtaylılar zeer, kimiyeviy maddeler ve boya qullanğanını bile turıp, qıtaylılarnı kirsetken akimiyetniñ işbu areketleriden dolayı şok keçirgen.
– Ya yatırımcılar nasıl davrana?
– Yatırımcılar yüzsüzce davrana. Qanunsız şekilde kommunikatsiyalarğa barıp bağlanalar. «Yatırım» yapqan qıtaylılar içecek suv olmağan köylerde suv yolaqları çekilgen borularğa bağlanalar.
– Özleri içün menfiy olacaq aqibetniñ ögüni almaq içün Qırım sakinleri ne yapalar?
– Çeşit rayonlarda qıtaylı yatırımcılarnıñ Qırımda sebzevatçılıqnen oğraşqanını yasaqlaycaq mitingler keçirilip başlandı.
Biñlerce insanlar imzalağan cedveller tizildi. Devletniñ er türlü müessiselerine, şu cumleden Qırım Cumhuriyetiniñ yolbaşçısı Sergey Aksönovqa onlarnen muracaatlar yollanıldı. Yerli sebzevatçılarnen cemaat temsilcileriniñ Qırım Cumhuriyetiniñ başında turğan sımalarnen körüşüv teşebbüsi muvafaqiyetsizliknen bitti. Atta açıq kütleviy tedbirlerde bile akimiyet bu mesele boyunca sual berileceginden qaçınaraq politsiya ve qoruması artına saqlanıp yurdi.
– Akimiyette çalışqan iç kimse insanlarnı aytqanlarına asla qulaq asmadımı?
– Lâkin eninde-soñunda Devlet Şurasınıñ reisi Vladimir Konstantinovqa raatsızlığımıznı bildirmege çare taptıq ve o, bu meseleni al etecegine söz berdi. Sözüni tutar dep ümüt etemiz.
Ancaq icra organları daima Qıtay yatırımcılarınıñ menfaatlarını qorçalap kele, çünki ... qıtaylılarğa berilgen topraqlar deputat ve memurlarğa ait ve yatırım leyhaları bir yıllıq müddetke imzalana.
– Qıtaylı ziraat yatırımcıları Qırımda yerleşip qalacaq olsa neler olması mumkün dep belleysiñiz?
Qırım sebzevatçısı içün bu bir ölüm olur
– Eger qıtaylılar Qırımdaki sebzevatçılıq saasına kirsetilecek olsa, bizler kütleviy icretniñ, Qırım istisalcısınıñ qısmen ya da tamamile mahv etilmesiniñ şaatı olur, onyıllarğa bereket bermeycek topraqlarğa ve «Qırım mahsulı» degen şubeli brend altında Qırım sakinleriniñ sağlığına zarar berecek mahsulatqa saip olurmız.
Yerli istisalcı içün bu bir felâket olur. Sezonda Qırım ükümetiniñ toqal siyaseti sebebinden olar öz mahsulatını satıp olamay ediler ve tamam yançığıñda bunıñ kibi küçlü bir raqip peyda ola. Qırım sebzevatçısı içün bu bir ölüm olur.
