Ukraina ükümeti Qırımdaki ukrainalılarnen bağ tutulması boyunca müessiselerara tedbirler planını tasdıqladı. İşbu planğa istinaden Qırım meseleleri boyunca butün nazirlik ve müessiseler ortaqlaşıp çalışacaqlar.
Vaqtınca işğal etilgen territoriyalar ve devlet içinde mecburen köçken şahıslarnıñ meseleleri boyunca naziri Vadim Çernış Ukraina yarımadanıñ azat etilüvine kerek dercedei azır olmağanını beyan etti.
«Qırımnıñ yarın keri qaytqasına azırmızmı? Yoq, yüz faiz degil. Ukrain memurları keçüv devrinde çalışmağa azırmı? Yarın – yoq, lâkin biz bunıñ üzerinde çalışamız. Nazirlik ve akimiyetniñ diger organları Kyiv politehnika institutında mahsus mütehassıslar içün programma azırladı, olar anda oquylar. Bir qaç kün evelsi bizler Ukraina prrezidentine bağlı devlet idaresi Milliy akademiyesınen Qırımğa azır mütehassıslar yollamaq maqsadınen memurlar içün yañıdan azırlav ve talebelerniñ oquması boyunca memorandum imzaladıq. O kün kelgence, biz işğal altında bulunğan ealinen maksimum alâqada olmaq kerekmiz. Qırım problemasını sıq-sıq territoriya probleması dep köreler. Bizler, memurlar işğal altında yaşağan insannı körgenini isteymiz».
Vaqtınca işğal etilgen territoriyalar meseleleri naziriniñ birinci muavini Yusuf Kürkçi, ükümet planı adiy Qırım sakinleri yöneltilgenini ayta.
Bütün ğayretlerimiz bizim vatandaşlarımız memuriy ve ictimaiy hızmetlerden faydalanmasına imkân yaratmaqnen bağlıYusuf Kürkçi
– Bu plannıñ amelge keçmesiniñ yekâne koordinatorı – bizim nazirliktir. Bu işni yapacaq olğanlarğa baqacaq olsaq, vesiqada akimiyetniñ tek bir dane organı cevapkâr olacaq bir maddesi yoq. Bu – içinde er şey qanun tarafından belgilengen muayyen çerçeveler içinde areket etilecek, kerçek manada kompleksli vazifeler qoyğan kompleksli bir plan sayıla. Şunıñ içün «yedi bala baqıcısınıñ balalrınıñ közü yoq» degen vaziyet olmaz. Bütün ğayretlerimiz işğal etilgen territoriyalarda yaşağan bizim vatandaşlarımıznıñ: tasil, sağlıq ve doğğanı aqqında şeadetnamesinden başlap, ölüm şeadetnemesine qadar olğan uquqiy statusnıñ resmiyleştirilüvi içün kerek memuriy ve ictimaiy hızmetlerden faydalanmasına imkân yaratmaqnen bağlı. Biz Qırım sakinleriniñ bütün ihtiyaclarını esapqa almağa tırıştıq – şunıñ içün bir fikirge kelgence bir yılımız ketti.
Ukrain siyasiy talilcisi Yuliya Tişenko, ukrain ükümetiniñ planı Qırım sakinlerine kerçekten de akimiyet organlarınen işbirlik yapmağa yardım eter dep saya.
Qabul etilgen plan akimiyet organlarınıñ koordinatsiya etüvine ve problemalarnıñ çezilmesine yardım eter dep ümit etemizYuliya Tişenko
– Anda, mesela, 2014 senesinden soñ, Qırımda doğğan balalar içün vesiqa alınmasını tezleştirecek protseduranen bağlı real areketler aqqında yazılğan. Bugünki künde rusiyeli organlar tarafından berilgen doğğanı aqqındaki şeadetnameler ukrain mahkemeleri tarafından qanuniyleştirile ve başqa bir yol yoq. Uquqimayecileriniñ malümatına köre, çeşit sebeplerden dolayı, Ukraina Qırımda doğğanı ve ölgeni aqqındaki şeadetnamelerniñ 20%ni esapqa alıp olamay. Bazı insanlar bürokratik sedlerni çezmek için, qıta qısmına kelip olamaylar. Lâkin bizler, hızmetlernen bağlı insanperverlik teşebbüsleri, qabul etilgen plan akimiyet organlarınıñ koordinatsiya etüvine ve problemalarnıñ çezilmesine yardım eter dep ümit etemiz.
(Metinni Vladislav Lentsev azırladı)
