İlhaq etilgen Qırımnıñ apishanelerinde 14 kişi vefat etken dep haber ete Qırım.Aqiqat muhbiri, Kreml nezareti altındaki Qırım «ombudsmeni» Lüdmila Lubinanıñ er yılki esabatına esaslanıp.
Esabatqa köre, 13 kişi çoq qan coyğanı, yürek yetersizligi ve İİV sebebinden vefat etken, 1 kişi ise, özüni öldürgen.
Lubina qayd etkenine köre, keçken sene onıñ adına Qırım apishanelerinde tutuv şartları boyunca 64 dane, tibbiy yardım kösterilüvi keyfiyeti boyunca 62 dane şikâyet kelgen.
Bunen beraber esabatta, Aqmescit SİZOsında qarardan ziyade mabüs tutulğanınıñ köstergiçi tüşkeni aqqında aytılmaqta.
«Aqmescit SİZOsında qarardan ziyade mabüs tutulğanınıñ köstergiçi 60%ge tüşken, akbuki keçken sene bu köstergiç 80-90%ni teşkil ete edi», – denilmekte esabatta.
Qırım «ombudsmeni» bergen malümatqa binaen, qırımtatarlarnen ukrainlerniñ diskriminatsiya yapılğanı inkâr etile, yarımadada söz serbestliginiñ bozulmağanı aqqında da haber etile.
2016 senesi fevral ayında Avropa parlamenti Rusiye tarafından ilhaq etilgen Qırımda, onıñ sakinleriniñ, hususan, qırımtatarlarnıñ «misli körülmegen derecede» aq-uquqları bozulğanınen bağlı rezolütsiya qabul etken edi.
Qırım ilhaq etilgen soñ, yarımadada aman-aman er kün tintüv, insanlarnı tutıp aluv vaqiaları ve çeşit türlü yasaqlar yüz bere. Qırımnıñ rusiyeli ükümeti yarımada da insan aqları bozulğanı aqqındaki haberlerni inkâr ete.
Ukraina ve halqara uquq teşkilâtları bir qaç sefer halqara közeticelerniñ yarımadağa kirsetmekni rica etken ediler.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
