Link açıqlığı

Saatnıñ esas haberi

Qarasuvbazarda kütleviy tintüvler: tafsilâtlar


Qarasuvbazarda tintüvler
Qarasuvbazarda tintüvler

Qarasuvbazarda Rusiye telükesizlik hadimleri «Güzel» ticaret ağınıñ tükânları ile qırımtatar milliy areketiniñ faaliyetçileri, iş adamları ve hayriyecilerniñ evlerinde tintüvler keçirdiler.

Tintüvler aqqında İnsan aqları boyunca Qırım alâqa gruppasınıñ koordinatorı Abdureşit Cepparov bildirdi.

Aq-uquq qorçalayıcısı: «Qarasuvbazarda «Güzel» ticaret ağı ve «KrımOpt» şirketiniñ bütün tükâları yanında içinde balaklavalı telükesizlik hadimleri olğan maşinalar tura. Ticaret merkezleri yanında – avtobuslar. Alğan malümatıma köre, tintüv «KrımOpt»nıñ mudiri Ali Bariyevniñ evinde keçe. Vaziyetni ögrenmege devam etem», – dep ikâye etti.

Ali Bariyevde yapılğan tintüv aqqında «Qırım birdemligi» de bildirdi.

Tintüvlerniñ tafsilâtlarını Facebookta Qırımtatar Milliy Meclisiniñ reisi, Ukraina halq deputatı Refat Çubarov bildirdi.

Çubarov: «Rus işğalcileri qırımtatar iş adamları, hayriyeciler ve qırımtatar milliy areketiniñ iştirakçileri Ali Bariyev, Asan Bariyev, Remzi Velilâyev, Resül Velilâyev, Ekrem Velilâyev, Zera Velilâyeva ve olardan ayrı yaşağan yetişken balalarınıñ evlerine tintüvler ile basıp kirdiler», – dep qayd etti.

Onıñ sözlerine köre, aynı vaqıtta Qırımnıñ başqa rayonlarında da – ağa-qardaş Velilâyevlerge ait ğıda mahsulatlarını tarqatuv saasında Qırımnıñ yetekçi şirketi olğan «KrımOpt»nıñ istisal bazaları ve onlarca şirket tükânlarında tintüvler yapıldı.

Tintüvler yapılğan yerlerde atıcı silâlar ile silâlanğan telükesizlik hadimleri yerleştirildi
Refat Çubarov

Çubarov: «Bütün tintüvler yapılğan yerlerde atıcı silâlar ile silâlanğan mahsus qısımlarnıñ bayağı büyük küçleri yerleştirildi. Tintüvler yapılğan yerlerniñ perimetri boyunca qaravullar qoyuldı. Qırımdan, Qarasuvbazarda «KrımOpt» ofisi yanında qararnen 400 kişi toplandı, dep bildireler. Al-azırda tintüvler yapılğan diger yerlerge de qırımtatarlar kelmekte», – dep qayd etti.

«Qırım birdemligi»niñ malümatına köre, Qarasuvbazarda Rusiye telükesizlik hadimleri tintüvden soñ «KrımOpt» mudiri Ali Bariyev ve ondan ğayrı iş adamı Resul Velilâyevniñ qız qardaşı Zera Velilâyevaalıp kettiler.

Şaatlarnıñ aytqanına köre, telükesilik hadimleri, nomerasız maşinalarnen keldi. Rusiye mahsus hizmetleri hadimleriniñ qollarında silâ ve başlarında balaklavalar bar.

Al-azırda Rusiye telükesizlik hadimleri ve Kremlniñ kontroli altında olğan Qırım ukümeti tarafından bu vaziyetke dair berilgen izaatlar yoq.

«Güzel» ticaret ağı ve «KrımOpt» şirketi iri bir iş adamı ve hayriyeci Resül Velilâyevge ait.

Qırım Rusiye tarafından ilhaq etilgen soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübhe altında tutulğan Qırım musulmanlarınıñ evleri ketken sayın daa sıq olaraq kütleviy surette tintilmekteler.

XS
SM
MD
LG