Vaqtınca işğal etilgen Qırımdan balalar, sadeleştirilgen sistema vastasınen (TMBsiz, tasil aqqında vesiqasız, üç imtian berip) 35 Ukraina aliy oquv yurtuna kirmek imkânından ğayrı, başqa yolnen de ketmek mümkünler. Bu yol – eksternat (ya da mesafeden oquv) ve TMB yazuv.
İlhaq etilgen Qırımnıñ talebelerine, eñ evelâ qolaysız tarihler sebebinden (mayıs 22-den iyün 13-ne qadar) Tışqı mustaqil baalavnıñ (TMB) sessiyasında iştirak etmek içün sıñırlı imkânlar bar. Bu sebepten olar içün iyülde qoşma sessiya teşkil etildi.
Qayd etüv mayıs 3-te başlanacaq ve mayıs 21-ge qadar devam etecek. Baalav ise 2018 senesi iyül 2-den 11-ge qadar keçirilecekler.
Ukrainanıñ tasil keyfiyetini baalav merkezi TMBniñ qoşma sessiyası içün muayet tarihlerni tayin etti:
İyül 2 – ukrain tili ve edebiyatı;
İyül 3 – matematika;
İyül 4 – ingliz tili ve ispan tili;
İyül 5 – biologiya, alman tili;
İyül 6 – Ukraina tarihı;
İyül 9 – coğrafiya, fransız tili;
İyül 10 – fizika;
İyül 11 – himiya.
Qırım mezunları içün tışqı mustaqil baalavda iştirak etmek içün er angi oquv şekli (kündüz, aqşam, mesafeden, eksternat ve ilh.) boyunca Ukraina territoriyasında bulunğan bir de-bir umum tasil muessisege qabul etilmek kerek. Daa tolu malümatnı Ukrainanıñ tasil keyfiyetini baalav merkezi (УЦОЯО) ya da Ukraina Tasil ve ilim nazirliginiñ saytlarından almaq mümkün.
Oleg Ohredko, TsGP «Almedia»nıñ eksperti ve talilcisi
«Bloglar» rubrikasında ifade etilgen fikirler muelliflerniñ öz fikirlerini aks etip, muarririyetniñ fikrini aks etmey bileler