Rusiye tarafından ilhaq etilgen Qırımda mahsus hizmetler, arbiy komissariatlarnı qullanıp, emekdaşlıqqa celp etüv ile oğraşalar.
Aq-uquq qorçalayıcısınıñ sözlerine köre, o, Qırım sakinleri celpname ile arbiy komissariatlarğa çağırılğan soñ, anda Rusiyedeki mahsus hizmetleriniñ hadimleri tarafından qarşılap alınğanları aqqında haber aldı.
Aq-uquq qorçalayıcısı: «Qırımda Rusiyeniñ mahsus hizmetleri tarafından qullanılğan yañı usul aqqında belli oldı – insannı celpname ile arbiy komissariatqa davet eteler. O kele ve onı, kabinetke ketirip, FSB hadimleri ile yüz-yüzge qaldıralar. Olar ise kelgen kişini emekdaşlıq yapması içün qandırmağa başlaylar. Olarnıñ birisi, emekdaşlıqnı red etüv nasıl yaman neticelerge ketire bilecegini ayta, ekinci ise emekdaşlıq sayesinde nasıldır nimetlerniñ elde etilecegini vade ete», – dep ikâye etti.
Al-azırda Rusiye mahsus hizmetleri ve Kremlniñ kontroli altında olğan Qırım ukümeti tarafından bu haberge berilgen izaatlar yoq.
Bundan evel ilhaq etilgen Qırımdaki Rusiye arbiy komissariatları, qomşu Rusiyeniñ arbiy oquv yurtlarına kirmek daveti ile teşviqat kampaniyasını başladılar.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
