İlhaq etilgen Qırımda insan aqlarınıñ bozuluvları boyunca bir çoq rezonanslı ve siyasiy maqsatnen açılğan işlerni alıp barğan Rusiye advokatı Nikolay Polozov Qırım.Aqiqatqa, cinayet şübhelisi ya da qabaatlanğannıñ tahqiqatçı tarafından sorğulanğanda özüni nasıl tutması kerek olğanını añlattı.
«Evelâ, bu statusta endi advokatnen beraber olacağıñıznı añlamaq pek muim: bu, ya devlet tarafından berilgen advokat, ya da (bu daa yahşıdır) bu cinaiy iş boyunca sizni qorçalağan öz advokatıñız olacaq», – dep qayd ete adliyeci.
Advokatnıñ aytqanına köre, er insan ifade bermekten vazgeçmek mumkün, lâkin, qorçalavıñıznıñ strategiyası ve taktikasını köz ögünde tutuıp, bu hususta evelden öz advokatıñız ile aqıl tanışsañız, daa yahşı olur.
Polozov: «Sorğu esnasında tahqiqatçı ile añlayışlı tarzda, raat, sayğı kösterip laf etmek kerek. Bir de-bir provokatsiyağa berilmek, çatışma içün sebep ola bilecek şeyler yapmaq ya da küfür sözler söylemek kerekmey», – dep tevsiye ete.
Sorğu esnasında çatışma içün sebep ola bilecek şeyler yapmaq ya da küfür sözler söylemek kerekmey
Tahqiqatçı sorğunıñ neticesi boyunca protokol tize, ve bu protokol onıñ özü, siziñ ve advokatñıznıñ, em de o yerde bulunğan diger şahıslar tarafından imzalana, dey adliyeci, – ve tahqiqatçığa sorğu esnasında videokameranı qullanmaq mumkün olğanını añlata.
«Protokolda sorğunıñ künü, başlama ve bitme vaqtı, bütün bulunğan insanlarnıñ adları yazılmaq kerek. Protokolnı diqqatnen oquñız. Tahqiqatçınıñ bir yerde aytmağanıñıznı yazğanını körseñiz – o yerni tüzetmesini rica etiñiz. O, tüzetmekni red etse – bunı protokol içün yazğan mulâazalarıñızda qayd etiñiz», – dey aq-uquq qorçalayıcısı.
Şunı qayd etmeli ki, protokol toldurılğan soñ bütün boş qalğan alanlar üstlerinden sızılmaq kerek, dey Polozov.
Protokol toldurılğan soñ bütün boş qalğan alanlar üstlerinden sızılmaq kerek
«Protokolda sıñırlanmağan sayıda mulâazalar tizmek mumkünsiñiz. Em şahsen özüñiz, em de qorçalayıcıñız. Mulâazalar yazılğan yapraqlarnı protokolğa ilâve etmek kerek. Olarnıñ ilâve etilgeni aqqında malümatnı ise doğrudan protokolğa yazıp, bu yazıda yalıñız olar qaç yapraq olğanını degil, aynı zamanda mundericeleriniñ tasvirini de qayd etmek kereksiñiz», – dep añlata adliyeci.
Şunı hatırlamaq kerek ki, sorğu başlamadan evel tahqiqatçı insanğa, Rusiye Cinaiy-protsessual kodeksiniñ 46-nci ve 47-nci maddelerinde qayd etilgen aqlarını añlatmaq borclu. İnsan ifade bermekni red etse bile, tahqiqatçı protokolnı kene de tize.
«Siz protokolnı imzalamaqtan vazgeçseñiz, tahqiqatçı sorğulama şaatları yardımınen siziñ vazgeçkeniñizni qayd etecek. Hatırlamaq kerek olğan esas şey – Rusiye Anayasasınıñ 51-nci maddesi boyunca özüñizge qarşı ifade bermemege aqqıñız bar», – dep qayd ete Polozov.
