Link açıqlığı

Saatnıñ esas haberi

Zarema Seitablayeva: Metropoliya Qırım içün para qızğana


Qırım haritası. İllüstratsiya
Qırım haritası. İllüstratsiya

Rusiye metropoliyası tarafından ilhaq etilgen Qırımğa paranıñ ayırılması boyunca vaziyetniñ ketken sayin daa beter olğanını sıq-sıq eslep başladım.

Rusiye ordusına alınuv aqqında ilânlarda ayda on sekiz biñ rublelik (7,63 biñ hrivnalıq) maaş seslendirile. Poliste biraz daa çoq, lâkin acemiyler içün o da mına saña degil. Söz kelimi, metropoliyanıñ öz territoriyasında polis hadimleriniñ maaşları bayağı ziyade. İhtimal ki, em Qırım sakinleri metropoliya içün tam manada vatandaşlar degil, em de Kremldeki şorbacılar Qırım polis hadimleriniñ esamesini oqumaylar.

Çoqusınıñ pensiyaları on biñden az olğan pensionerler nasıl sağ qala, aytmaq zor

Misal içün, Qırımda mahkeme icracılarınıñ aylıqları yigirmi biñge (8,5 biñ hrivnağa) qadar barmay. Temiz maaşı sekiz biñ ruble (3,4 biñ hrivna) olğan ve qoşumlar ile on beşke (6,36 hrivna) çıqqan tsivil devlet memurları aqqında söylegende asıl da em külecegiñ, em ağlaycağıñ kele. Adiy bücetçilerniñ aylıqlarını asıl da hatırlamaq istemeyim, çünki anda er şey pek osal. Çoqusınıñ pensiyaları on biñden (4,2 biñ hrivna) az olğan pensionerler nasıl sağ qala, söylemek zor.

Ve şimdilik, Qırım sakinlerinde ayat seviyesiniñ istiqrarlı bir tüşüv tendentsiyası yalıñız artqan sürat ile közetile.

«Ğalipler taqımı» içün metropoliyanıñ iltifatı eksilmey

Aynıı zamanda «ğalipler taqımı» içün metropoliyanıñ iltifatı eksilmey. Olar Qırımda evelkisi kibi at oynatalar. «Ğalipler taqımı»nıñ birinci simalarına ait inşaat şirketleri tarafından Aqmescitte ve deñiz yalısındaki zonada muazzam qurucılıq işleri yapıla. Tabiatqa antropogen yük saasındaki vaziyet deşetli. Tabiat evelki alına qaytıp olamay. Deñiz yalısınıñ boyu ise kanalizatsiya aqızmaları ile o qadar bulaştırıla ki, tezden Qırımndaki Qara deñiz yalısında yuvunmağa da mumkün olmaycaq.

Lâkin Qırımnıñ dotatsiyalı bücetinde temizlev tertibatlarına para yoq, metropoliya da endi para bermey. İnşaat şirketlerini bu ekologik işlerge para bermekni kimse mecbur etalmay ve istemey, çünki olar «ğalipler taqımı» liderlerine ait. İşte, böyle bir quvançsız vaziyet.

Yaqında faal bir grajdan pozitsiyası olğan tanış pensionerimni kördim ve fikirlevindeki metamorvozalarğa taaciplendim. 2014 senesinde o, etrafqa tükürçiklerini yağdırıp, «tuvğan limanğa qaytqanına» quvanğanını hatırlayım. Şimdi ise o, utanmayıp, Qırımdaki Rusiye aqiqatını küfür sözlernen söge edi. Men, bu küfürlerni diñlemege istemeyip, öz yoluma devam etkende ise, o, artımdan: «Bütün bu belâlar andan – töpeden», – dep taşladı. Ve qısqa bir sükünetten soñ: «Putinden», – dep ilâve etti.

Zarema Seitablayeva, Qırım sakini, bloger (telükesizlik maqsadı ile muellifniñ adı ve soyadı deñiştirildi)

«Bloglar» rubrikasında ifade etilgen fikirler muelliflerniñ öz fikirlerini aks etip, muarririyetniñ fikrini aks etmey bileler

XS
SM
MD
LG