Sizni şaat olaraq çağırğan olsalar tergevci tarafından sorğulanğanda özüñizni nasıl tutmaq kerek? Neni aytmasañiz daa yahşı olur ve nege diqqat etmek kerek? Bunı Qırımda insan aqlarınıñ bozuluvları boyunca bir çoq işlerni alıp barğan Rusiye advokatı Aleksey Ladin añlata.
Aq-uquq qorçalayıcısı, şaatta ifade bermekni red etmege aqqı yoq – buña qarşı cinaiy mesuliyet tayin etilgen, dep qayd ete. O, diqqat etilmesi kerek olğan esas noqtalarnı ayıra.
«Evelâ, siz qoluñızğa celpnameni alıp, onı alğanıñız içün imza atqan soñ sorğuğa kelmek mecburiyet peyda ola. Tahqiqatçığa sorğuğa kelgen soñ, özüñizge ve yaqın aqrabalarıñızğa qarşı ifade bermemege aqqıñız olğanını hatırlamaq kereksiñiz», – dey Ladin.
Özüñizge ve yaqın aqrabalarıñızğa qarşı ifade bermemege aqqıñız bar
Advokatnıñ aytqanına köre, cinaiy iş yaqın aqrabañızğa qarşı açılğan olsa, siz onı eñ yahşı taraftan kösterip ifade bermek mumkünsiz.
«Lâkin cinaiy işke alâqası ola bilecek hususlar aqqında aytmaq kerekmey. Qabaatlavnıñ hususiyetlerini bilmeyip, yaqın adamıñızğa zarar ketirmek mumkünsiñiz», – dep, tevsiye ete uquqçı.
Aleksey Ladin, tahqiqatçınıñ sualleri sizge «tayğaq» körünse, olarğa cevap bermemekni tevsiye ete. İnsan, özüne ve yaqın aqrabalarına – ana-baba, balalar ve ömür arqadaşına qarşı şaatlıq etmemege izin bergen Rusiye Anayasasınıñ 51-nci maddege atıfta bulunıp, ifade bermekni red etmek mumkün, dep qayd ete advokat.
«Bir taraftan, ifade bermek mecbursıñız, çünki ifade bermekni red etüv ya da bile-bile yalan ifadeler berüv içün cinaiy mesüliyet bar. Lâkin, diger taraftan, ilk baqışta sizge alâqası olmağan bir sıra sualler, ahır-soñu cinaiy işniñ sizge qarşı açılacağına ketirmek mumkünler. Bu sebepten Rusiye Federatsiyası Anayasasınıñ 51-nci maddesi aqqında bir vaqıt unutmañız».
