Rusiye prezidenti Vladimir Putinniñ uzun zamandan berli yardımcısı olğan Vladislav Surkov, onıñ devleti Ğarpnen integratsiyalaşuv ümüdinden vazgeçkeni ve geosiyasiy izolâtsiyanıñ yañı devrine dalğanı aqqında ayta.
Aprelniñ 9-nda «Rusiye global siyasette» adlı mecmuada derc etilgen «Melezniñ yañğızlığı» adlı maqalesinde şiyasetşınas, «Rusiyeniñ Ğarpqa destaniy seferi» bitkeni, yani Ğarp medeniyetiniñ bir parçası olmaq oğrunda «dört yüz yıl devam etken» «bir çoq semeresiz ıntıluvları» yekünlengenini bildirmekte.
Moskvanen Ğarp arasındaki munasebetler suvuq uruştan soñ körülmegen eñ aşağı seviyede bulunmaqta. Munasebetler, Rusiye 2014 senesi Ukrainağa bağlı Qırımnı ilhaq etip, Donbasstaki separatistlerge qol tutmağa başlağanından berli pek tez fenalaşıp başladı. Ğarp aynı zamanda Moskva, Suriyede yedi yıldan berli devam etken Asad rejimine qol tutqanını qabul etmey ve Büyük Britaniyada sabıq casus Sergey Skripal ve onıñ qızınıñ zeerlenüvindeki rolünden dolayı çorlana.
Surkov çoq yıllar devamında Putin memuriyetiniñ yetekçi strategi olıp keldi. Al-azırda o Rusiye ükümetiniñ Ukraina yönelişinden mesuliyetli.
