Link açıqlığı

Saatnıñ esas haberi

Bir çoq siyasiy mabüslerni qorçalağan Qırım advokatı Emil Kurbedinov Qırım.Aqiqatqa, sizge sorğuğa çağıruv ile celpname ketirgen olsalar özüñizni nasıl tutmaq ve nege diqqat etmek kerek olğanıñız aqqında ikâye etti.

Advokat: «Pek çoq kişi uquqqoruyıcı organlar tarafından ketirilgen ve vatandaşlarnı qabaatlanğan, şübheli ya da şaat sıfatında sorğuğa çağırğan celpnamelerge büyük emiyet bermey», – dey.

Celpnamedeki malümatta soyadıñız, adıñız ve baba adıñız, adresiñiz, sizni nasıl sıfatta, qaysı kün ve saatqa, kim, qayda ve nasıl iş boyunca çağırğanı olmaq kerek

Advokat, böyle vaziyetnen qarşılaşqanlarnı bir qaç esas noqtalarğa diqqat etmekni tevsiye ete. Uquqqoruyıcı organlarnıñ hadimleri sizden birden bu celpnameni imzalamaqnı talap etecekler. Lâkin bunı yapmazdan evel onı diqqatnen oquñız. Celpnamedeki malümatta soyadıñız, adıñız ve baba adıñız, adresiñiz, sizni nasıl sıfatta, qaysı kün ve saatqa, kim, qayda ve nasıl iş boyunca çağırğanı olmaq kerek.

Er bir madde boyunca daa tafsilâtlı:

1. Soyadıñız, adıñız, baba adıñız ve adresiñizniñ doğru yazılğanlarını mutlaqa teşkeriñiz. Eger olar pasportıñızda yazılğanlarından farqlı olsa, bu celpname siziñ içün degil.

2. Celpnamede siziñ statusıñız, yani sizni ne sıfatta çağıralar – şübheli, qabaatlı ya da şaat olaraqmı – qayd etilmek kerek. Bu pek muim, çünki siz anda ne sıfatta baracağıñıznı ve nasıl qorçalav yolunı saylamaq kerek olğanını bileceksiz.

3. Mutlaqa çağırılğan kün ve saatıñız kösterilmek kerek. Aynı zamanda celpname «ertesi künge» olmamalı. Advokatnı tapa bilmeñiz içün eñ azından 3-4 künüñiz olmaq kerek. Sizni ertesi künge çağırsalar, bu qorçalavğa aqqıñıznı boza – sizge qorçalayıcını tapmaq içün munasip vaqıt bermeyler.

4. Sizni çağırğan hadim aqqında malümat olmaq kerek.

5. Celpnamede, çağırılğanıñızğa sebep olğan cinaiy iş aqqında malümat olmaq kerek. Eñ azından iş yürsetilmesiniñ nomerası ve eñ çoq – iş qaysı madde boyunca ve kimge qarşı başlatıldı, qayd etilmek kerekler.

Siziñ yetişmegen malümatnı talap etmege ve yalıñız bundan soñ imzalamağa aqqıñız bar

Eger yuqarıda qayd etilgen maddelerden iç olmadı biri olmasa – celpnameniñ böyle şekli qanunğa uymay ve aqqıñıznı boza, dey advokat. Ondan ğayrı, Emil Kurbedinov, siziñ yetişmegen malümatnı talap etmege ve yalıñız bundan soñ imzalamağa aqqıñız bar, dep qayd ete. Celpnameniñ alâqa vastalarınen teslim etilmesi de ola. Bu taqdirde bütün kerekli olğan mezkür malümatnı sizge oqup yazdırmaq kerekler.

Kurbedinov: «Er ne ise de, bu bir altın qaidedir: celpnameni alğan soñ, oqudıñızmı, yoqmı, advokatqa muracaat etiñiz, ve bütün qalğan tafsilâtlarnı endi onen muzakere etiñiz», – dep hulâsa çıqara.

XS
SM
MD
LG