Ukraina Yuqarı Rada reisi Andriy Parubiy aprelnin 2-nde, işğal etilgen Qırımda Rusiye prezidenti saylavlarınıñ qanunsız olaraq tanılmasına dair qarar imzaladı. Bunıñ aqqında ukrain parlemntiniñ saytında haber etile.
Bunen beraber Parubiy, Ukraina prezidentine hitaben, tecavuzcı devlet sayılğan Rusiye devletine qarşı iddialarnı azırlaycaq organnı teşkil etmege çağıruv imzaladı. Bu fermanda Ukrainanıñ halqara ortaqlarına da muracaat yer almaqta. Olar Rusiye prezidenti saylavlarınıñ ilhaq etilgen Qırım topraqlarında ötkerilgenini qanunsız tanımağa davet etileler.
Mart 18-de Rusiyede ve onıñ tarafından ilhaq etilgen Qırımda prezident saylavında rey berüv ötkerildi. Resmiy Kyiv ve ondan ğayrı bir sıra halqara teşkilât ve bir çoq dünya devleti yarımadadaki saylavnıñ neticelerini tanımaylar.
Martnıñ 19-nda Ukraina prezidenti Petro Poroşenko, Rusiye tarafından mart ilhaq etilgen Qırımda keçirilgen saylavnıñ neticelerine «sıfır derecesinde» ve «uquqiy neticeleri olmaycaq», degen edi.
Martnıñ 22-nde Ukraina Yuqarı Radası ilhaq etilgen Qırımda keçken Rusiye prezidenti saylâvalarını tanılmamasına dair qararğa rey berdi. Asğariy 226 ses olmaq kerek ekende bu qarar içün 255 halq deputatı rey berdi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
