Qırımtatar Milliy Meclisi reisiniñ muavinleri İlmi Umerov ve Ahtem Çiygoz Frenkistan tiş işleri naziri Jean-Yves Le Driannı Rusiyege qarşı sanktsiyalarnıñ quvetlendirilmesine tesir etmege çağırdılar.
Bu aqta Umerov Facebook saifesinde söz yürsete.
«Biz Ahtemnen beraber (Çiygoz - QA) körüşüvde (Le Drian ile) daa ziyade Qırımda razı olmağan Ukraina vatandaşlarına kerçek terror vaziyetinde neler yapmaq kerek olğanı aqqında laf ettik. Sanktsiyalarnı quvetlendirmek, siyasiy ve diplomatik basqı yapmaq kerek olğanı aqqında ayttıq. Eger tecavuzcı-devlet ve terrorist-devlet cezalandırılmasa, beñzer şeyler diger devletlerde de, hususan Frenkistanda da olabile dep ayttıq», – dep yaza Umerov.
«İnterfaks-Ukraina» haber etkenine köre, öz nevbetinde Frenkistan tış işleri naziri Le Drian, Kyivde keçken matbuat konferentsiyasında «Qırımda prezident saylâvları keçirgeni içün Rusiyege qarşı sanktsiyalar quvendirilmesi mumkün olacağını» aqqında ayttı».
Martnıñ 18-nde Rusiyede ve ilhaq etilgen Qırımda prezident saylâvları ötkerildi. Resmiy Kyiv ve bir sıra halqara teşkilâtlarnen beraber dünyanıñ bir çoq devleti yarımadada keçken saylâvlarnı tanımay.
Fevralniñ 16-nda Ukraina prezidenti Petro Poroşenko dünya cemaatçılığını ilhaq etilgen Qırımda Rusiye prezidentiniñ kelecekteki saylavlarınıñ neticelerini tanımamağa çağırğan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
