Fransız L'Harmattan neşriyatı tarihçı Gülnara Bekirovanıñ «Yarım asırlıq qarşılıq: qırımtatarları sürgünden avdetke (1941-1991 seneleri)» adlı kitabını fransız tilinde çıqardı. Bu aqta martnıñ 23-nde Qırım.Aqiqatqa tarihçınıñ özü ikâye etip berdi.
Bekirovanıñ sözlerine köre, kitapta qırımtatar halqınıñ sürgün tarihı ve tarihiy vatanına avdet küreşi taqdim etilmekte. Kitapnıñ kiriş maqalesini Ukrainadaki Frenkistan sabıq elçisi Jacques Faure, mudaqqemesini – qırımtatar halqınıñ lideri Mustafa Cemilev, soñki sözüni - Qırımtatar Milliy Meclisiniñ reisi Refat Çubarov yazdılar.
«Bu, fransız tilinde çıqqan ve qırımtatar halqınıñ XX asırdaki siyasiy tarihınen bağlı eñ salmaqlı ve temelli bir tedqiqattır. Kitapnıñ taqdimnamesi 2018 senesi martnıñ 18-nde Parij Halqara kitap salonınıñ ukrain stendi çerçivesinde ötkerildi. Kitap ve onıñ muellifi fransız cemaatı tarafından pek sıcaq qarşılandı», – dep ikâye etti tarihçı.
Gülnara Bekirova fransız tilinde çıqqan kitabınen beraber
Bekirova, bu kitap qırımtatar tarihı içün pek muim olğanını qayd etti.
«Bu qırımtatar halqınıñ öz aq-uquqı içün cian tecribesi içün ğayet muim olğan ve amelde körülmegen zorbalıqsız qarşılıq kösterüv küreşidir. Bütün bir halq Sovetler kibi totalitar bir monstrğa qarşı, yat kimseniñ qanını tökemeden ğalebe qazanğanını köstere. Bu ise, Avropa tarihınıñ bir qısmı olıp qalmalı», – dedi o.
2017 senesi iyün ayında Kievde qırımtatar tedqiqatçısıGülnara Bekirovanıñ «Yarım asırlıq qarşılıq: qırımtatarları sürgünden avdetke (1941-1991 seneleri). Siyasiy tarih oçerki» adlı kitabınıñ taqdimnamesi ötkerilgen edi. Kitapqa daa evel belli olmağan, tedqiqatçınıñ Qırım, Kyiv ve Moskva arhivlerinden elde etken resmiy sovet neşirleri ve kerçek ikâyeler, şaatlarnıñ intervyuları kirsetilgendir. Bekirova ilmiy materialnı sade tilde taqdim etmege tırışqanı aqqında ayttı.
