2017 senesi noyabrniñ 16-ndan 2018 senesi fevralniñ 15-ne qadar Qırımda, 2017 senesi oktâbrniñ 14-nde bir kişilik piketler keçirgeni içün 78 qırımtatarınen eki musulman para cöremesinen cezalandı, denilmekte BMT insan aqları boyunca Yuqarı komissarınıñ maruzasında.
Vesiqağa binaen, piketler, qırımtatarnıñ terroristik ya da ekstremistik teşkilâtlarında aza olğanında şeklep, apiske alınuvına qarşı yapılğan narazılıqlar edi. Piket iştirakçileri kün evel izin alınuvını talap etken tedbirlerni keçirüv yolınen cemaatçılıq toplaşuvlarınen bağlı Rusiye qanunını bozğanında qabaatlı dep tanılğan edi. Aynı zamanda bu aktsiyalar kün evel izin alınmasını talap etmegen şahsiy aktsiyalar olaraq keçirilgen edi.
BMT İnsan aqları Baş komissarı İdaresiniñ qararlarında «bir kişilik piket şeklinde ötkerilgen aktsiyalar milliy havfsızlıq, cemaat tertibi, sağlıq, ealiniñ ahlâqı, serbestliginiñ imaye etilüvine zarar ketirecegine dair deliller olmağanını köstere» dep qayd etile.
Martnıñ 19-nda Ukrainadaki BMT insan aqları boyunca Monitoring missiyasınıñ yolbaşçısı Fiona Frazer, Kyivde ötkerilgen matbuat konferentsiyasında Ukrainada insan aqlarınen bağlı vaziyet boyunca nevbetteki 21-nci BMT maruzasını taqdim etti.
2017 senesi oktâbrniñ 14-nde yarımadada küç idaresi hadimleriniñ qırımtatarlar, musulmanlarğa qarşı yapqan repressiyalarına narazılıq köstermek maqsadınen bir sıra bir kişilik piketler ötkerilgen edi. «Qırım birdemligi»niñ malümatına köre, aktsiyalarğa 100den ziyade insan qoşulğan. Olarnıñ ekseriyeti tutulıp alınaraq, politsiya bölüklerine alıp barılğan edi.
Rusiye 2014 senesi Qırımnı ilhaq etken soñ, FSB yarımadada muntazam surette, jurnalist, faaller ve qırımtatar cemaat erbaplarını sorğulay, Ukraina tarafdarı, muhalefetçi olğan vatandaşlarnen diniy azlınlıq temsilcileriniñ evlerinde tintüvler keçirip, apiske ala. Uquq qorçalayıcılar rusiyeli küç idareleriniñ bu areketleri siyasitnen bağlı dep saya.
