«Qırım ‒ Ukrainağa toprağı». ABD Devlet Departamentiniñ spikeri Heather Nauert Rusiye prezidenti Vladimir Putinniñ yarımada esapta Rusiyege «ait» olğanı aqqındaki sözlerini izaatladı.
«Dört yıl evel Rusiye Ukrainada qanunsız, uydırılğan «referendum» ötkererek, ilhaq etilgen ukrain toprağınıñ qanuniyleştirüv teşebbüsçisi olğan edi. Qırım sakinleri silâlı Rusiye askerleriniñ nezareti altında rey bermege mecbur etildi. Rusiyeniñ bu sahte «referendum» boyunca ukrainalılar serbest saylâv aqqı qullanğanları aqqındaki beyanatları er vaqıt işançsız dep qabul etilip keldi», ‒ denilmekte Heather Nauertniñ beyanatında.
Putin Rusiyeniñ Qırımda nisbeten sahte tecavuzlarını tekrarlap, halqara uquqnı red etkenini tanıdı
«Martnıñ 14-nde Qırımda keçken mitingte Rusiye prezidenti Vladimir Putin, Rusiyeniñ Ukraina topraqlarına nisbeten sahte tecavuzlarını tekrarlap, Rusiye ükümeti halqara uquqnı, mustaqil millitlerniñ topraq bütünligini red etkenini tanıdı, - dep qayd ete Nauert. – Putinniñ izaatlarını diqqatğa alaraq, «referendumnıñ» qanunsız olğanına ve Qırım sakinleriniñ buña qarşılıq çekken zorluqlarınıñ fiyatına diqqat çekilmesi pek muim. Soñki dört yıl devamında Rusiye mecbur etüv kampaniyası qullanıp, ilhaq teşebbüsine qarşı çıqqanlarnıñ epsine cefa çektirmekte».
Qırım Ukrainanıñ bir parşası ola. Rusiye yarımadanı Ukrainağa keri qaytarmağance, sanktsiyalar devam etecek
«İşğalci akimiyet qırımtatarlarnı, etnik ukrainalılarnı, Ukraina tarafdarı olğan faalllerni, cemaatçı ve mustaqil jurnalistlerni siyasiy sebeplerge köre taqip etip, repressiyalarğa oğrata; aynı zamanda akimiyet ükümetke bağlı olmağan teşkilât ve mustaqil KHV bastırmağa devam ete. Biz bu bozuluvlar aqqında haber etmege devam etken cesur insanlarğa qol tutamız ve Rusiyeden öz fikrini ifade etüv serbestligi, barışıqlı toplaşuv ve birleşüv, din ve ittiqadınıñ serbestliklerini bastıruv areketlerini taqtatmağa çağıramız», ‒ dey Nauert.
«Biz Ukrainanıñ bütün dünya tarafından tanılğan sıñırları içinde topraq bütünligi ve suverenitetini tanığanımıznı qayd etemiz. Qırım Ukrainanıñ bir parçasıdır ve Qırımnen bağlı sanktsiyalarımıznı, Rusiye yarımadanı Ukrainağa keri qaytarğance devam ettirecekmiz», ‒ dep bildirdi ayrıca Nauert.
