Rusiye tarafından işğal etilgen Qırım ve Ukrainanıñ qıtaiy qısımı arasındaki memuriy sıñırda martnıñ 8-nde ğayıp olğan 24 yaşındaki qırımtatarı Abdulla İbragimov tapılğan. Bunı «Qırım birdemligi» birligi haber etti.
Faallerniñ bergen malümatona köre, yoq olğan vaqıtta İbragimov «Kalançak» keçit noqtasında tutıla edi, ve anda o «Rusiye FSB hadimleri tarafından ahlâqiy ve fizikiy tazyıqqa oğratılğan edi».
«Onıñ başına rezina tayağınen urğanlar, betini döggenler. Ve, soy-sopları, adliyeciler, cemiyetçiler KHV ve içtimaiy ağlarda ses kötermese edi, bu tevqif nenen yekünlenecegi malüm degim. Şimdi o öz evinde. Avtobusnen kelip çıqtı», – dep yazılğan.
Keçende haber edildi ki, Rusiye tarafından ilhaq etilgen Qırım ve Ukrainanıñ qıtadaki qısmı arasında keçken memuriy sıñırda 24 yaşlı qırımtatar, Kezlev sakini Abdulla İbragimov ğayıp olğan. O Hersondan ilhaq etilgen Qırımğa kete edi. Martnıñ 8-nde, üylede o, Ukrainanıñ keçirüv noqtasından keçip, Rusiyeniñkine taba yol aldı. Aqşam saat 18-ge qadar İbragimovnıñ Rusiye telefon nomerası alâqada edi, lâkin ondan soñ irişüv zonasınıñ tışında oldı.
Soñra onı qıdırmaq içün memuriy sıñırğa İbragimovnıñ yaqın aqrabaları ve adliyeci Rustem Kâmilev kettiler.
Rusiye sıñırcıları tarafından şimdilik bu hususta açıq menbalarda izaat berilemdi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplinka».
Rusiye Qırımnı ilhaq etken soñ, FSB yarımadada muntazam surette insanlarnı tutıp ala, tintüvler keçire, mustaqil jurnalist, qırırmtatar faalleri, muallefet ve Ukraina tarafdarı olğan cemaat erbapları ve diniy azınlıqlarnı teşkil etkenlerni sorğulay. Uquq qorçalayıcılar rusiyeli küç hadimleriniñ işbu areketlerini siyasiy ceetke esaslı dep tanıy.
