Rusiye tarafından ilhaq etilgen Qırım ve Ukrainanıñ qıtadaki qısmı arasında keçken memuriy sıñırda 24 yaşlı qırımtatar, Kezlev sakini Abdulla İbragimov ğayıp oldı.
Bunı martnıñ 8-de aqşam «Qırım birdemligi» cemiyet birleşmesi bildire.
Olarnıñ bildirgenine köre, İbragimov Hersondan ilhaq etilgen Qırımğa kete edi. Martnıñ 8-nde, üylede o, Ukrainanıñ keçirüv noqtasından keçip, Rusiyeniñkine taba yol aldı. Aqşam saat 18-ge qadar İbragimovnıñ Rusiye telefon nomerası alâqada edi, lâkin ondan soñ irişüv zonasınıñ tışında oldı.
Qırımtatar faaliyetçileri, ondan soñ onıñnen alâqa yoq, dep iddia eteler. Onı qıdırmaq içün memuriy sıñırğa İbragimovnıñ yaqın aqrabaları ve adliyeci Rustem Kâmilev kettiler.
Bildirilgenine köre, ihtimal ile, ğayıp olğan şahısqa naqil etüv hizmetini «Bravo Lüks» naqliyat şirketi berdi. Faaliyetçiler, taşıyıcı bunı iza etmek istemedi, dep iddia eteler.
Rusiye sıñırcıları tarafından şimdilik bu hususta açıq menbalarda izaat berilemdi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplinka».
