Qırım Muhtar Cumhuriyetiniñ prokuraturası, Qırım MC Yuqarı Şuasınıñ sabıq deputatını devlet hainliginde qabaatlav işi mahkemege yollanılğanı aqqında haber ete.
Fevralniñ 28-nde nezaret muessisesiniñ saytı haber etkenine köre, Qırım Muhtar Cumhuriyeti Yuqarı Şurasınıñ sabıq deputatı Ukraina Cinaiy kodeksiniñ 111 maddesi 1-nci qısmında (devlet hainligi) belgilengen cinayet boyunca qabaatlanmaqta.
«Cinayet işi boyunca taqiqat keçirilüvi esnasında Qırım Muhtar Cumhuriyeti Yuqarı Şurasınıñ mezkür deputatı 2014 senesi mart-aprel aylârındaQırımnıñ işğal etilmesine yardım etkenine dair kesen-kes deliller elde etilgen», – denilmekte haberde.
Prokuratura, qabaatlanğan şahısnıñ iştirakinen «qanunğa zır şekilde uydurıq «Qırım Cumhuriyetiniñ Anayasası» qabul etilgen ve bunıñ neticesi olaraq «Qırım Cumhuriyeti» denilgen qanunsız devlet qurulışı meydanğa ketirilgen.
«Qabaatlanğan şahıs on ekiden on beş yılğace azatlıqtan marum etile bile», – dep ilâve etildi prokuraturada.
Haberde Qırım deputatınen bağlı hususiy malümat berilmey.
Qırım Muhtar Cumhuriyetiniñ prokuraturası, 2017 senesi dekabr ayına qadar Qırım MC Yuqarı Şurasınıñ 75 sabıq deputatı qıdıruvğa berilgeni haber etken edi.
Qırım ve Aqyar şeeri territoriyasında 2014 senesi martnıñ 16-nda yarımadanıñ statusı boyunca dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de ABD referendumdaki rey berüvniñ neticelerini tanımadılar. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
