Qırımtatar milliy areketiniñ faali Nariman Celâl iddia etkenine köre, martnıñ 18-nde Kreml Qırımda keçirmege niyetlengen Rusiye prezidenti saylâvlarına er kesniñ kelgenini teminlemek içün,ilhaq etilgen yarımadanıñ Qarasuvbazar rayonında rusiyeli küç idaresiniñ hadimleri çeşit qorquzuv usulları qullanmaqtalar.
«Poçta bölükleri, yerli memuriyet, mesken-kommunal müessise hadimleri kün evel insanlardan saylâvda istirak etecegi etmeycegi aqqında sorav keçireler. Soqaqlarda tanış olmağan insanlar yürip, qanunğa zıt şekilde sakinlerniñ hususiy malümatlarını yazıp alalar», – dep yaza Celâl fevralniñ 27-nde özüniñ Facebook saifesinde.
O, «insanlar saylâvlarda iştirak etmege istemegenlerini beyan etkeninde, işten boşatılacağı, köylerde ise – ictimaiy ihtiyaclar içün kerek spravkalar berilmeycegi, yollar yapılmaycağı ve suv keçirilmeyceginen qorquzalar», dep haber ete.
«Eñ muimi şu ki, Qırımnıñ Qarasuvbazar rayonındaki (qırımtatar - QA) milliy areketiniñ faalleri, RF prezidentiniñ Qırımda keçirilecek saylâvları qanunsız olğanı ve halqara cemaatçılıq olarnıñ neticesini tanımamaq kerek olğanından emin», – dep ilâve etti Celâl.
Rusiye prezidentiniñ saylâvları 2018 senesi martnıñ 18-ne – yani Qırım Rusiye tarafından ilhaq etilgen künge tayin etildi. Saylâvlarda: Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy olaraq, sekiz namzet iştirak etecek.
Fevralniñ 16-nda Ukraina prezidenti Petro Poroşenko dünya cemaatçılığını ilhaq etilgen Qırımda keçirilecek Rusiye prezidenti saylâvlarınıñ neticesini tanımamağa çağırdı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
