Link açıqlığı

Saatnıñ esas haberi

Türkiye Cumhuriyetiniñ Ukrainadaki fevqulâde ve salahiyetli elçisi Yönet Can Tezel, «2014 senesi olıp keçken vaqialar, iç bir zaman qanuniyleştirilmez», dep beyan etti, dep haber ete fevralniñ 26-nda «Ukrinform».

«2014 senesi olıp keçken vaqialar (Qırımnıñ Rusiye tarafından ilhaqı - QA), iç bir zaman qanuniyleştirilmez. Vaqıt keçken sayın bu bir fakt olayata», – dep bildire KHV diplomatnıñ fevralniñ 26-nda Kyivde keçken «Zapt etilgen yarımada: dört yıllıq tirenüv» adlı dördünci halqara forum çerçivesinde aytqan sözlerini.

Qırım.Aqiqat haber etkenine köre, elçi qırımtatar halqınıñ «Qırımdaki yaşayışı ve barışıq» aqqında da söz yürsetti.

«Ukrainanıñ Qırımğa nisbeten yürsetken siyaseti barışıq dialogı üzerinde qurulğanını da qayd etemiz. Belki de, belli bir vaqıttan soñ, bu dialogqa Rusiye de qoşulır. Qırım añlaşmalar elementi olmalı. Men, bir realist olaraq, ukrainalılar cemiyetçılıqnıñ siyasette emiyetli olğanını köstergenlerini qayd etmek isteyim. Qırımtatarlar da bizim devletimiz qol tutqanı ve ürmet etkeni içün, tesir etip olalar», – dep qayd etti elçi.

2014 senesi martnıñ 20-nde Ukraina Yuqarı Radası qırımtatarlarnı Qırımnıñ tamır halqı dep tanıdı. Bu qararğa 283 halq deputat rey berdi. Ukraina qırımtatar halqınen diger milliy azlıqlarnıñ Ukrainanıñ tamır halqı olaraq etnik, medeniyet, til ve din kimliginiñ saqlap qalması ve inkişafını kefil olmaqta.


Fevralniñ 26ünde Kyivde «Zapt etilgen yarımada: dört yıllıq tirenüv adlı dördünci halqara forum ötkerildi.

Ukrainada fevralniñ 26-sı kününi «Qırımnıñ Rusiye işğaline qarşı tirenüv künü» olaraq qayd etilmesi teklif etile. 2014 senesi bu künü Qırım Yuqarı Şurasınıñ binası ögünde Ukraina torpaq bütünligine bağışlanğan miting ötkerilgen edi. O zaman miting iştirakçilerine Rusiye tarafdarı olğan faaller, şu cümleden «Rus birligi» firqasınıñ vekilleri qarşı çıqqan edi.

Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.

XS
SM
MD
LG