Ukrainanıñ Türkiyedeki elçihanesi qırım türkleri Genel merkezinen beraber, Qırımnıñ Rusiye tarafından ilhaq etilgeniniñ dört yıllığı ve XX asır başında qırımtatar milliy areketiniñ lideri olğan, belli erbap Noman Çelebicihannıñ facialı ölüminiñ 100 yıllığı munasebetinen umumiy tedbriler ötkerdi.
Ukrainanıñ Türkiyedeki elçihanesi Twittirinde, tedbirler çerçivesinde sergi ve konferentsiyalar ötkerilgeni, Ukrainanıñ Türkiyediki elçisi Andrey Sıbiga ve qırımtatar milliy areketiniñ faali Nariman Celâl ve başqaları çıqış yapqanları aqqında haber ete.
Ukraina diplomatı çıqış esnasında, Kyiv halqara mahkemelerde Rusiyeniñ arbiy tecavuzı ve işğal etilgen territoriyalarda insan aqlarınıñ bozıluv faktlarını obyektiv körip çıqılmasına yönelgen areketlerini qayd etti.
«Qırımtatar Milliy Meclisiniñ temsilcisi (Celâl –QA) Qırımdaki vaziyet aqqında haber eterek, Rusiye işğalge qarşı çıqqanlarğa basqı yapqanı, taqip etilgen, apiske alınğan, öldürilgenler ve yapılğan aqsızlıqlar aqqında ikâye etti. Qırımtatar halqı ukrain halqınen beraber azat etüv meselesinde bir areket ete», – dep haber ete diplomatik müessise.
Aynı zamanda tedbir çerçivesinde Azatlıq Radiosdınıñ rusiyeli muhbiri Anton Naumlükniñ «Yaşı yetkenlerniñ Qırımdaki balalığı» adlı fotosergisi teşkil etildi. Sergi, Qırımdaki siyasiy mabüslarnıñ babasınıñ vesayetinden marum qalğan balalar aqqında ikâye ete, çünki babalarınıñ qarşı açılğan cinaiy işler ve mahkemeler yıllarnen devam ete.
Ukrainada fevralniñ 26-sını «Qırımnıñ Rusiye işğaline qarşı tirenüv künü» olaraq ilân etmege teklif etile. 2014 senesi aynı künü Qırım Yuqarı Şurasınıñ binası ögünde Ukrainanıñ topraq bütünligine bağışlanğan miting ötkerilgen edi. O zaman miting iştirakçilerine Rusiye tarafdarı olğan faaller, şu cümleden «Rus birligi» firqasınıñ vekilleri qarşı çıqqan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
