Link açıqlığı

Saatnıñ esas haberi

Qırımtatarlarnıñ liderleri Trumpnen körüşmeli – tatar uquqimayecisi


Tatar uquqimayecisi, Bütüntatar cemaat merkezi prezidiumınıñ azası Rafis Kaşapov
Tatar uquqimayecisi, Bütüntatar cemaat merkezi prezidiumınıñ azası Rafis Kaşapov

Qırımtatar halqınıñ liderleri ABD prezidenti Donald Trumpnen körüşip, ilhaq etilgen Qırımda Rusiye yapqan repressiyaları aqqında ikâye etmek kerek, belki bu o devletke qarşı sanktsiyalarnıñ quvetlendirilmesine yardım eter. Bu fikirni Qırım.Aqiqat Radiosı efirinde tatar uquimayecisi, Bütüntatar cemaat merkezi prezidiumınıñ azası Rafis Kaşapov beyan etti.

«Men qırımtatar halqınıñ lideri Mustafa Cemilev ve Qırımtatar Milliy Meclisiniñ reisi Refat Çubarovqa ABD prezidenti Donald Trumpqa muracaat etkenlerini tevsiye etmek ister edim. O, olarnı qabul etse, halqına nizbeten neler yapılğanı aqqında ikâye etip olur ediler. ABD qol tutqan taqdirde (qırımtatarlarğa - QA), oña bütün Avropa devletleri qoşulır edi», – dedi Rafis Kaşapov.

BMT Qırım ve Ukrainanıñ menfaatlarını «daa da sert bir şekilde» qorçalamaq kerek, çünki Ukrainağa qol tutulmasa, onıñ Rusiye arbiy tecavuzına qarşı turması pek qıyın. «Eger dünya cemaatçılığı Donbass ve Qırımda olıp keçkenlerge köz yumacaq olsa, soñu facia olur», – dep ilâve etti Rafis Kaşapov.

Tatar uquimayecisi Rafis Kaşapovnıñ tolu intervyusını yaqın künlerde Qırım.Aqiqat saytında oquñız.

2015 senesi sentâbr ayında rusiyeli Tatar cemaat merkeziniñ yolbaşçısı Rafis Kaşapov, Qırımnıñ ilhaqını tenqit etip, separatizmge çağıruv yapqanında qabaatlanıp, üç yıl apıs cezasına mahküm etildi. Kaşapov İnsan aqları Avropa mahkemesi şikâyet etken edi. Kaşapov 2017 senesi dekabrniñ 26-nda azat etildi.

2018 senesi fevral ayında Rafis Kaşapov Rusiyeni terk etti.

Rusiye Qırımnı ilhaq etken soñ, FSB yarımadada muntazam surette insanlarnı tutıp ala, tintüvler keçire, mustaqil jurnalist, qırırmtatar faalleri, muallefet ve Ukraina tarafdarı olğan cemaat erbapları ve diniy azınlıqlarnı teşkil etkenlerni sorğulay. Uquq qorçalayıcılar rusiyeli küç hadimleriniñ işbu areketlerini siyasiy ceetke esaslı dep tanıy.

XS
SM
MD
LG