Link açıqlığı

Saatnıñ esas haberi

Noman Çelebicihan Canköy rayonındaki tuvğan yerlerinde añıla


Qırımnıñ Canköy rayonında qırımtatar milliy areketiniñ XX asırdaki lideri Noman Çelebicihannıñ tuvğan Büyük-Sonaq köyü (köy saqlanıp qalmadı) yanında oña bağışlanğan hatıra tedbiri ötkerildi. Bu aqta Qırım.Aqiqatqa fevralniñ 23-nde Qırım ve Aqyar musulmanları diniy idaresi (QAMDİ) matbuat hızmeti temsilcileri ikâye etip berdi.

«Bu tedbirde Aqmescitten kelgen qırımtatar tili ve edebiyatı ocaları, musafir-tarihçılar çıqış yapa. Epsi olıp 200ge yaqın iştirakçi toplanıp, Noman Çelebicihannıñ ömüri ve taqdiri aqqında ikâye eteler», – dep tasdıqladı idare temsilcisi.

Fevralniñ 23-nde Qırımnııñ bütün camilerinde qırımtatarlarnıñ diniy ve siyasiy erbabına bağışlanğan dualar ötkerildi.

Fevralniñ 24-nde Aqyarda, XX asır başında qırımtatar milliy areketiniñ lideri olğan Noman Çelebicihan soñki yolğa ozğarılğan yerindeki barelyefke çiçek qoyulması planlaştırılmaqta.

2018 senesi fevralniñ 23-nde XX asır başında qırımtatar milliy areketiniñ lideri olğan, belli erbap Noman Çelebicihannıñ facialı ölümine 100 yıl tola.

Noman Çelebicihan (1885-1918) – qırımtatar yazıcısı, qırımtatarlarnıñ milliy gimniniñ muellifi, 1917-1918 seneleri qurulğan qırımtatar halqı birinci Qurultaynıñ esasçısı olğan diniy, cemaat ve siyasiy erbabıdır.

Noman Çelebicihan 1885 senesi molla qorantasında doğa. Bağçasaray, İstanbul, Sankt-Peterburgda oquy, qırımtatar yaşlarınıñ maarif ve inqilâbiy teşkilâtlarında iştirak ete. XX-ncı asırnıñ başında eñ istidatlı qırımtatar edebiyatçısı olaraq tanıla. Qırımtatarlarnıñ «Ant etkenmen!» adlı milliy gimniniñ müellifi ola. 1917 senesi Fevral inqilâbından soñ Musulman icra komitetiniñ reisi, Qırım müftisi – soñra ise, Birinci Qırımtatar Milliy Qurultayınıñ reisi olaraq saylâna. 1918 senesi yanvar ayında bolşevikler tarafından tevqif etilerek, fevralniñ23-nde Aqyar apishanesinde deñizciler tarafından öldürile. 33 yaşında olğan müftiniñ cesedi deñizge atıla.

XS
SM
MD
LG